Sekretáriu Estadu ba Protesaun Sivíl, Alexandrino Xavier de Araújo. Imajen/António Goncalves

DILI, 02 setembru 2019 (TATOLI)-Governu Timor-Leste liuhusi Sekretáriu Estadu Protesaun Sivíl ho BNPB (Badan Nasional Penanggulangan Bencana) Indonézia, iha tempu badak sei asina memorandu entendimentu (MoU-sigla inglés) atu fó asisténsia ba vítima dezastre naturaís sira iha liña fronteira terrestre entre nasaun rua.

“Akordu ne’e haree liu ba dezastre  bainhira  akontese iha jurisdisaun liña fronteira terrestre  husi Timor-Leste  ka Indonézia, bele apoiu servisu hamutuk hodi  salvaguarda komunidade sira,  intermus apoiu umanitária nune’e mós halo atuasaun ba dezastre ne’ebé mosu hanesan ahi han no seluk tan,” informa Sekretáriu estadu Protesaun Sivíl, Alexandrino Araújo, ohin, ba TATOLI iha Caicoli, Dili.

Daudaun ne’e, parte rua halo hela preparasaun ba MoU ne’e. Enkuantu husi Governu Timor-Leste nian, liuliu  SEPS sei haruka ba Konsellu Ministru atu halo apresiasaun iha tempu besik.

“Espera katak iha tinan ne’e nia laran,  bele selebra ona akordu refere iha nivel nasaun rua Timor-Leste ho BNPB-Indonézia,” informa Sekretáriu Estadu Alexandrino Araújo.

 Nia garante katak,  liuhusi kooperasaun ne’e, sei fó asisténsia di’ak liután ba sidadaun nasaun rua iha fronteira hanesan Atambua Provínsia Nusa Tenggara Timur (NTT-sigla Indonézia), Oé-Cusse, Covalima no Bobonaro.

Jornalista         : Nelson de Sousa

Editór                : Francisco Simões

 

HAKEREK NO HATÁN

Please enter your comment!
Please enter your name here