DILI, 02 Setembru 2019 (TATOLI)-Komandu Polisia Nasionál Timor Leste (PNTL) la rejista kazu ruma maka akontese durante selebrasaun festa konsulta populár ba dala-20 ne’ebé selebra iha loron 30-31 agostu 2019.
“Durante serimónia ne’e la’o, Komandu la rejistu krime ruma mak akontese, ita nia situasaun jerál la’o hakmatek,” informa Segundu Komandante Polísia Munisípiu Dili, Superintendente Asistente, Euclides Belo, ba jornalista iha Komandu Munisípiu Dili, ohin.
Komandu PNTL Munisípiu Dili apresia ho kontribuisaun povu no autoridade lokál ho munisípiu, hodi fó susesu ba eventu istóriku ne’e.
Alende ne’e, Komandu Polisia Nasionál Timor-Leste no FALINTIL-Forsa Defeza Timor-Leste (F-FDTL), apresia mós ba envolvimentu Membru Konsellu Polisiamentu Komunitáriu (KPK) hodi fó seguransa ba serimónia ne’e tanba organizadu no la’o di’ak tebes.
Euclides dehan, ho kontribuisaun ema hotu nian hodi festeja festa povu nian ne’e hatudu ona ezemplu ba bainaka internasionál sira katak povu Timor-Leste hakarak moris iha situasaun ida pás no hakmatek hodi apoiu dezenvolvimentu.
Komandu PNTL no F-FDTL kontinua husu ba povu atu mantein situasaun ida pás iha komemorasaun tinan 20 prezensa Misaun INTERFET iha loron 20 setembru 2019.
Jornalista : Eugénio Pereira
Editór : Francisco Simões
