Diretór Jerál Planu no Parseria, Ministériu Edukasaun Juventude no Desportu (MEJD), Antoninho Pires. Imajen/Tatoli

DILI, 02 setembru 2019 (TATOLI) –Ministériu Edukasaun Juventude no Desportu (MEJD) hahú iha 2017 to’o tinan ne’e rejista estudante 300 ne’ebé hakotu sira-nia eskola iha dalan klaran hodi partisipa fali iha ensinu ekivalente atu hetan grau edukasaun formál.

MEJD seidauk iha dadus formál kona-ba estudante feto no mane hira mak la konsege remata sira-nia prosesu aprendizajen iha nivel ensinu báziku no ensinu sekundáriu. MEJD rasik rejista ona kuaze estudante 300 mak hetan ona nivel edukasaun formál liu husi prosesu ensinu rekorrente.

Diretór Jerál Polítika, Planeamentu no Parseria, Antoninho Pires hateten, eskola rekorente (ensinu naun-formál) ninia grau eskolaridade ne’e la tama iha grau eskolaridade edukativu ninian.

“Tanba ita-nia sistema eskolaridade ne’e hatuur tiha ninia prosesu formál ne’e hahú husi ensinu báziku, ensinu sekundáriu no ensinu superiór,” hateten Diretór Antoninho Pires ba profisionál komunikasaun sosiál sira, iha edifísiu Gráfika Nasionál Timor-Leste (GNTL), Colmera, segund (02/09/2019).

Diretór ne’e dehan, grau ensinu rekorrente ne’e sei akomoda ba ensinu eskolaridade ne’ebé iha maibé ninia grau ne’e la tama iha sistema formál ne’ebé Ministériu Edukasaun kria.

Porezemplu estandardizasaun ensinu formál eskolaridade tinan sia kompleta maibé ensinu rekorrente bele kompleta de’it iha tinan lima. Nune’e mós ensinu sekundária tuir padraun Ministériu Edukasaun nian tenke kompleta tinan tolu maibé ho ensinu rekorrente ne’e bele akaba de’it iha tinan ida.

Tanba ne’e mak husi posibilidade ne’ebé iha prosesu ensinu rekorrente ne’e tenke kompleta ho ensinu ekivalénsia (ujian persamaan) ne’ebé realiza daudaun ba estudante primeiru no segundu siklu.

Husi rezultadu sira ne’e mak iha tinan kotuk ensinu ekivalénsia ne’e konsege gradua estudante 100 itál no agora kuaze 300 mak gradua ona.

Entaun husi diploma ensinu rekorrente nian ne’e identifika ho diploma ne’ebé mak sira foti iha ensinu ekivalénsia nian. Kuandu sira tuir ensinu báziku nia diploma mós hanesan formál tuir ensinu báziku nian inklui mós ensinu sira seluk no diploma ida ne’e garante duni sira atu kontinua ba Universidade.

“Maibé molok atu integra iha programa ne’e, estudante sira tenke prienxe kritériu ne’ebé iha tenke aprezenta dokumentu formál. Kuandu dokumentu sira ne’e lakon, parte eskola ne’ebé uluk estudante ne’e eskola ba tenke apoiu ho karta formál hodi klarifika estudante ninia eskola loloos,” esplika Diretór Antoninho Pires.

Notísia relevante:Programa MEK Mak Reforsa Polítika Sistema Ensinu

Jornalista: Tomé Amado

Editór     : Rafy Belo

HAKEREK NO HATÁN

Please enter your comment!
Please enter your name here