Jardín B.J. Habibie. Imajen/TATOLI

DILI, 29 agostu 2019 (TATOLI)-Ministru Reforma Lejizlativa no Asuntu Parlamentár no Ministru Turizmu, Komérsiu no Indústria (MTKI) interinu, Fidelis Manuel Leite Magalhães husu ba populasaun iha Dili atu proteje no kuída jardín ne’ebé konstrui besik ponte foun B.J. Habibie ne’ebé inaugura ona tanba buat ida sasán (bens) públiku ne’e sidadaun hotu-hotu iha devér atu kuidadu.

”Governu ne’e iha parte ida, maibé atu proteje ne’e liuliu sidadaun hodi fó protesaun ba bens sira ne’ebé maka bele lori moris di’ak ba sidadaun rasik”, dehan Ministru Fidelis ba jornalista sira hafoin partisipa serimónia inagurasaun ponte foun B.J. Habibie iha Bidau Santa Ana, ohin.

Ministru Fidelis dehan benefìsiária ba infraestrutura ne’ebé iha ne’e maka sidadaun tanba ne’e husu atu proteje.

Iha fatin hanesan, Vise-Prezidente Parlamentu Nasionál, Luis Roberto, husu mós ba komunidade atu kontinua tau-matan ba iha jardín ne’e.

Nia sujere ba Governu atu koloka seguransa másima iha jardín, nune’e bele proteje di’ak liután atubele uza nafatin ba tempu naruk.

“Tanba ita nian jardín barak maka inaugura, maibé Governu la tau-matan hodi koloka seguransa, tanba ne’e bá oin importante tebes hodi toma atensaun ba kestaun sira hanesan ne’e, nune’e asegura nafatin beleza jardín ninian”, tenik Luis.

Xefe Suku Bidau Santa Ana, Joao Bosco Amaral, promote sei kolabora ho rezidente tomak atu tau-matan ba ponte B.J Habibie no jardín.

Nu’udar autoridade lokál iha obrigasaun boot no nia promete sei kolabora mós ho seguransa hodi tau atensaun ba fatin ne’e tanba Governu iha inisiativa di’ak tebes hodi konstrui ponte no jardín ne’ebé furak, tanba ne’e sira sei proteje.

Jornalista : Natalino Costa

Editora : Maria Auxiliadora 

HAKEREK NO HATÁN

Please enter your comment!
Please enter your name here