Estudante Estudante Eskola Ensino basiku Filial 12 Otubru Tasitolu Fase hela liman antes atu tama escola. Imajen/Antonio Goncalves

DILI, 28 agostu 2019 (TATOLI)—Diretór Rotary Club Australia iha Timor-Leste, ohin, hateten sira-nia misaun importante ida maka atu fó apoiu fasilidade eskola nian liuliu kadeira no meza ba eskola sira iha mundu, maibé eskola sira iha Timor-Leste presiza duni bele halo kooperasaun liuhusi fundus integradu ida entre Governu, Asosiasaun dos Pais no Rotary Club.

Problema ba Rotary Club mak laiha fundus ka orsamentu sufisiente atu selu ró (barco) hodi hatama fasilidade eskola hanesan kadeira no meza hodi lori-fahe ba nasaun sira iha mundu tanba durante ne’e sira halo kooperasaun ho nasaun dezenvolvidu sira hodi fahe todan ida ne’e.

“Problema ba ami kona-ba osan atu selu ró ne’e mak laiha. Maibé Governu TL hamutuk ho inan-aman sira iha TL hakarak kontribui osan uitoan ba Rotary Club atu selu ró, ami prontu haruka kadeira sira ne’e mai hodi apoiu ba eskola sira iha TL,” dehan Diretór Rotary Club Australia iha Timor-Leste, Mario de Jesus, iha serimónia entrega kadeira no meza ba Eskola Ensinu Báziku Filial 12 de Outubru, Tasi-Tolu, Dili, kuarta (28/08/2019).

Tuir nia, kadeira meza barak mak sira apoiu ona ba nasaun lubuk ida hanesan Vanuatu, Papua Nova Guine (PNG) no nasaun Afrika sira seluk. Nia dehan, sorte netik Ministra Edukasaun husu ba sira iha Balibo tanba ne’e Rotary Club haruka duni kadeira no meza kontentór ida mai eskola ne’e.

Maibé, nia informa, kadeira no meza hirak ne’e la’ós foun ka lees-plástiku. Iha Australia, sasán sira ne’e ninia durasaun tempu liu ona entaun tenke tama ba resiklajen (daur ulang) entaun Rotary Club halibur fali hodi haruka ba eskola sira iha mundu.

“Kadeira meza sira ne’e la’os aat. Kondisaun di’ak hela. Bele garante nafatin ninia kualidade. Kuandu parte eskola sira hakarak pinta foun fali, ita haree sai fali hanesan foun,” nia dehan.

Ho apoiu meza no kadeira hamutuk 240 ba eskola Ensinu Báziku Filial 12 de Novembru Tasitolu ne’e, nia hatete, ho esperansa bele ona hamenus difikuldade profesór no alunu sira-nian iha prosesu ensinu aprendizajen iha sala de aula.

Jornalista: Tóme Amado

Editór     : Rafy Belo

HAKEREK NO HATÁN

Please enter your comment!
Please enter your name here