Ferik no Katuas sira forma no tuur hein hela iha Banku hodi simu pagamentu husi governu liuhosi BNCTL, Dili, 16 Jullu 2019. Imajen/ António Gonçalves

DILI, 29 agostu 2019 (TATOLI) – Prezidente Institutu Nasionál Seguransa Sosiál (INSS) hosi Ministériu Solidaridade Sosiál no Inkluzaun (MSSI), Longuinhos Armando,  relata idozu rihun 89.052  no inválide 8.190 iha territóriu  maka sai ona benefisiariu ba programa Governu hodi simu subdisiu osan ba tinan 2019.

Nia esplika prosesu pagamentu  ba faze dahuluk nian daudaun ne’e la’o hela, tuir planu Governu no Banku Nasionál Komérsiu Timor-Leste (BNCTL-sigla portugés), setembru ne’e sei konklui pagamentu ba benefisiáriu iha territóriu.

“Espera iha fulan setembru nia laran bele remata ona pagamentu, tanba daudaun ne’e idozu no inválide porsentu 80 mak hetan ona pagamentu, hela tan  porsentu 20”, informa nia ba TATOLI iha ninia serbisu fatin Kaikoli, ohin.

Longuinhos Armando rekoiñese prosesu pagamentu ba faze dahuluk la’o kleur, tanba ekipa tenke halo pagamentu ba benefisiáriu sira to’o suku, hela fatin, bainhira deteta labele la’o to’o fatin pagamentu.

Prezidente INSS ne’e fi’ar ekipa sei esforsu hodi konklui ona pagamentu faze dahuluk nian.

Jornalista: Nelson de Sousa

Editór: Agapito dos Santos

HAKEREK NO HATÁN

Please enter your comment!
Please enter your name here