Foto : #Oan_Timor, hosi Pájina facebook EDTL.

DILI, 28 agostu 2019 (TATOLI)-Kompañia Hedge Electronic sei tau-matan ba família matebian Andre Afonso ne’ebé hakotu iis tanba eletrisidade soke bainhira nia muda liña media tensaun tuan ba foun iha área gruta Kampung Baru, Dili.

”Ohin, deside ona hodi tau-matan ba iha família mate hodi haree matebian nia oan nian eskola to’o remata”, dehan jerente empreza Hedge Electric Unipessoal Lda, Lila Soares, ba Tatoli iha Komoro, ohin.

Nune’e mós responsabiliza ba metebian to’o nia serimónia funebre nian iha nia rai moris fatin, Lolotoe.

Jerente ne’e dehan kompañia deside haree família matebian tanba ida ne’e akontese iha oras serbisu nian no husi empreza rasik sente triste tebes tanba lakon ona tékniku di’ak ida hanesan matebian Andre Afonso tanba nia ema ida ne’ebé hatudu serbisu di’ak tebes, maibé serbisu ne’ebé nia hatudu labele kontinua tanba destinu ne’e ema ida la espera.

Ba akontesimentu ne’e, Lila ko’alia kona-ba ekipamentu ne’ebé maka durante ne’e tékniku sira uza hodi halo knaar, kompañia rasik prepara ba tékniku sira uza nu’udar seguransa hodi asegura ba sira-nia aan rasik bainhira hala’o serbisu.

Iha fatin hanesan, Quintão Gomes, nu’udar kolega matebian ne’ebé loroloron serbisu hamutuk hatete nia maka lori matebian Andre Afonso hodi bá serbisu iha empreza ne’e no sira serbisu ho kontratu ba fulan neen no foin mak kompleta semana ida hala’o knaar ne’e.

Nia haktuir akontesimentu ne’e katak maizumenus tuku 13:00 meiu dia, ho kolega tékniku na’in-tolu, inklui matebian ba dada eletrisidade iha Kampung Baru no kuandu matebian sa’e bá foin chek fiu hodi liga, hafodak nia hakilar depois alkati ne’ebé maka iha matebian nian liman laran monu, nune’e maka nia foin haree ba matebian forsa laiha, tabele tun ona no tanba ta’uk nia bolu kolega ida sa’e bá ho tali ba hatun matebian no sira lori bá sentru saúde Komoro, maibé lakonsege salva tanba sirkuitu maka’as.

Maun boot husi matebian, Artur Afonso, triste tebes lakon alin ne’ebé di’ak, maibé destinu husi Nai Maromak nian ema labele kontra.

Matebian Andre Afonso moris iha Postu Administrativu Lolotoe, Munisípiu Bobonaru, mate ho idade 30 no husik fen no oan ida.

Notísia relevante : Eletrisidade Soke Andre Afonso Hakotu Iis

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here