Jogu entre Lalenok FC no Atlético Ultramar. Imajen Tatoli/Hortençio Sanchez

DILI, 28 agostu 2019 (TATOLI)—Jogu Tasa 12 Novembru entre Atlético Ultramar no Lalenok United FC la terminadu tuir tempu normál tanba mosu dezintendimentu iha kampu laran.

Dezintendimentu ne’e mosu iha minutu 58 bainhira jogadór Lalenok halo erru hasoru jogadór Ultramar maibé árbitru la foti desizaun sériu no husik Lalenok lori bola tuir vontade.

Tanba ne’e, Prezidente Ultramar, Ano Gusmão la satisfáz hodi halo protesta hasoru Komisaun Kompetisaun no jogu komesa paradu.

Enkuantu, maioria jogadór Ultramar halai sai hosi kampu laran hodi halo protesta maka’as hasoru desizaun árbitru ne’ebé sira konsidera la justu. Situasaun manas liután bainhira jogadór Ultramar abandona kampu hodi lakohi joga. Iha parte seluk, jogadór Lalenok mantein iha kampu laran hodi hein desizaun hosi árbitru no Komisaun Jogu.

Ekipa estimadu hosi Manatuto ne’e ulun to’os hodi lakohi fila hikas ba kampu laran, entaun obriga árbitru no Komisaun Jogu foti desizaun hapara jogu no fó vitória ba Lalenok ho rezultadu 5-0 maibé iha jogu normál Lalenok marka ona golu ida iha minutu 55 hosi jogadór Elias Mesquita (10) ho nune’e rezultadu loloos hosi jogu refere hamutuk 6-0 konta mós ho golu lima ne’ebé komisaun oferese.

Ba jornalista sira, Diretór Kompetisaun LFA, Martinho Ribeiro hateten Komisaun hapara jogu bazeia ba regulamentu Federation Internationál Football Asosiation (FIFA), Federasaun Futeból Timor-Leste (FFTL) no Liga Futeból Amadora (LFA) nian.

“Ohin ami foti desizaun hapara jogu bazeia ba regulamentu FIFA, FFTL no LFA nian, tanba sira abandona kampu. Tuir regra, bele mosu dezintendimentu oinsá mós jogadór labele abandona kampu, no ami foti desizaun halakon kedas Ultramar ho rezultadu 5-0,” Martinho esplika.

Nia dehan, kona-ba sansaun seluk, Komisaun Jogu sei halo relatóriu aprezenta ba Komisaun Étika Disiplina LFA mak sei foti desizaun hasoru klube.

Haree ba situasaun ne’e sériu, órgaun LFA komesa halo komunikasaun ba malu nune’e bele tuur hamutuk hodi análiza no rezolve problema refere.

Iha sorin seluk, treinadór Lalenok Yance Matmei, haklaken Lalenok kumpri nafatin desizaun tomak LFA nian no mantein pozisaun iha kampu laran maski mosu dezintendimentu ne’ebé todan.

“Lalenok kumpri nafatin desizaun saida de’it mak iha. Ami sente kontente tanba bele hakat tan pasu ida ba oin. Iha jogu tuir mai, ha’u sei esforsu maka’as liután,” tenik Yance.

Entretantu, bainhira Tatoli konfirma asuntu ne’e ba Prezidente Ultramar, Ano Gusmão, maibé rejeita fó komentáriu.

Hosi rezultadu ne’e, Ultramar tenke sai ona hosi jogu Tasa 12 Novembru tanba sistema jogu ne’e bota fora ka lakon-sai. Maibé, Lalenok kontinua hakat ba oin hodi hein Assalam no Aitana iha semi finál.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here