Komunidade Timor-Leste no Indonézia tebe dahur iha ámbitu vizita delegasaun g7+. Foto: Nelia Borges

DILI, 28 agostu 2019 (TATOLI)-Centro Nacional Chega (CNC) hamutuk ho g7+ akompaña husi Embaixadór Indonesia iha Timor-Leste, Sahat Sitorus, ohin, vizita Mota-ain,  hodi observa direta relasaun amizade no progresu entre nasaun rua, Timor-Leste (TL) ho Republik Indonesia (RI), iha fronteira.

Delegasaun to’o iha fronteira simu ho dansa tradisionál no kultura entre Timor-Leste ho Indonézia. Iha vizita ne’e, reprezentante Filipina, Burundi, Guiné Bissau no Repúblika Sudan Sul kuda mós ai-oan nu’udar símbolu rekordasaun.

“Ha’u hakarak hateten de’it, ita hela iha illa ida, ne’ebé mak totál ema hamutuk 3.5 husi illa ida ne’e. Ami iha rasa no kultura ne’ebé hanesan, nune’e mós iha lian ne’ebé hanesan,” hateten Administradór NTT (Nusa Tengara Timur), Willy Brodus Lay iha nia diskursu, iha Mota-ain.

Nia reforsa, Timor-Leste ho Indonézia moris hamutuk ho dame. “Forsa rua konsege jere estabilidade nasaun rua ho respeitu no agora Timor-Leste hanesan ona nasaun soberania tanba nee kooperasaun entre nasaun rua tenke di’ak nafatin liuliu mós serbisu hamutuk iha ekonomia, kultura, desportu no diálogu tenke mantein atu hametin liután relasaun iha fronteira ho di’ak.  “Ami mós iha eventu kultura ne’ebé maka envolve nasaun rua ne’e hotu”.

Administradór Willy Brodus mós akresenta katak vizita ida ne’e bele sai inspirasaun ba iha entre país rua atu bele respeitu malu sein haree fila fali ba kotuk hodi kaer liman metin no la’o ba oin iha kooperasaun di’ak liu nune’e mantein relasaun di’ak liu iha fronteira.

Iha biban hanesan, Administradór NTT Willy Brodus Lay hato’o mós parabéns ba Timor-Leste relasiona ho komemorasaun tinan 20 Konsulta Populár.

Jornalista: Nelia Borges

Editór     : Rafy Belo

HAKEREK NO HATÁN

Please enter your comment!
Please enter your name here