Selebra aniversáriu BSTL ba daualuk ho doasaun raan. Imajen/Tatoli.

DILI,28 agostu 201 (TATOLI)-Banku Sentrál Timor-Leste (BSTL) realiza atividade doasaun raan hodi komemora nia ezisténsia ba daualuk nian iha Timor-Leste.

“Atividade ne’e ami hakarak halo ba ami-nia aniversáriu no ami iha hanoin ida katak hakarak halo doasaun raan ba maluk sira ne’ebé presiza tanba ita hotu hatene katak ho raan turuk ida bele salva ema nia vida”, Diretora Administrasaun BSTL, Maria Angela de Sousa Soares, hatete iha ámbitu doasaun ne’e iha BSTL, ohin, iha Avenida Xavier do Amaral, Formoza-Gricenfor.

Koordenadora ba aniversáriu BSTL ba daualuk , Maria Angela de Sousa Soares. Imajen/Tatoli.

Koordenadora ba aniversáriu BSTL ne’e hatutan atividade doasaun raan nu’udar atividade dahuluk ne’ebé BSTL realiza.

“Iha ami-nia aniversáriu ne’e, ami la halo atividade boot, ami só halo de’it mak doasaun raan”, katak Maria Angela de Sousa Soares.

Tuir lista ba doasaun nian, funsionáriu BSTL hamutuk 25 maka rejista hodi partisipa iha atividade refere.

Koordenadór Servisu Transfunsaun Raan iha Banco Sangue Hospital Nacional Guido Valadares, Tomas Adelino, agradese tebes ba BSTL, tanba raan importante tebes hodi ajuda ema seluk.

“Atividade ne’e di’ak tebes, tanba raan ne’e importante no di’ak ba ema nia saúde. Raan sira ne’e fó ba ita-nia maluk sira iha ospitál ne’ebé presiza. Ita presiza hasai raan tanba ita-nia raan kental liu bele afeta ba ita-nia saúde rasik ka moras stroke, tanba ne’e mak hamenus tiha raan sei di’ak tebes ba saúde”,  Tomas Adelino esplika.

Tomas salienta katak bazeia ba lista hosi BSTL totál funsionáriu ne’ebé iha bele atinje raan litru sanulu.

Banku Sentrál Timor-Leste formalmente kria iha 13 setembru 2011 ho nia funsaun atu asegura polítika monetária ho objetivu mantén estabilidade presu, nesesária ba kreximentu no dezenvolvimentu ekonómiku, iha podér atu regula no kontrola moeda no merkadu finanseiru, fó lisensa no superviziona instituisaun finanseira sira ne’ebé estabelese iha país.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here