Komisaun organizadora no bainaka importante sira hasai foto hamutuk ho manán-na'in sira ba kompetisaun te’in hahán lokál. Imagen/Antónia Maia Gusmão.

DILI, 27 agostu 2019 (TATOLI)-Restaurante Uma Na’in no Darda GM husi Munisípiu Vikeke sai vensedór iha kompetisaun te’in iha feira gastronomia tanba sira-nia kombinasaun ba hahán lokál di’ak no furak.

Liuhusi feira gastronomia ne’ebé realiza husi Ministériu Turizmu, Komérsiu no Indústria ( MTKI) hodi komemora tinan 20 Loron Konsulta Populár no Misaun INTERFET, halo mós kompetisaun te’in ba otél no restaurante sira iha nasionál no mós husi munisípiu hodi hatudu hahán típiku kada munisípiu nian, nune’e restaurante Uma Na’in sai vensedór dahuluk no Darda GM iha segundu lugár no restaurante Angel husi Lautein sai manán-na’in datoluk, hafoin avaliasaun husi juri sira nian ne’ebé xefia husi prezidente juri, Luis Simões, sidadaun portugés nian.

“Sira  aprezenta kombinasaun mak di’ak loos kona-ba kriatividade no sira-nia tradisaun husi sira-nia munisípiu rasik. Ami fó reseita balu atu ema tuir maibé ami mós fó oportunidade atu sira uza hahán husi sira-nia fatin, ne’ebé ema mai hosi Vikeke lori hahán hosi ne’ebá, entaun sira manán tanba konjugasaun hahán di’ak loos hosi tradisionál, kriatividade, ijiene no aprezentasaun ne’ebé di’ak”, Luis Simões hatete hafoin publika rezultadu avaliasaun ba kompetisaun te’in ne’e iha Sentru Konvensaun Dili (CCD- sigla portugés), ohin.

Luis Simões argumenta, kompetisaun gastronomia ne’e nia kualidade di’ak tebes. “Ha’u hakfodak katak atu haree sira te’in hahán di’ak loos. Ha’u kontente tebes atu haree sira-nia kriatividade. Kontente liután tanba sira uza produtu lokál atu valoriza gastronomia hosi Timor-Leste”, nia afirma.

Avaliasaun iha kompetisaun ne’e maka haree husi uza ingrediente Timor-Leste nian de’it, uza sasán ho ijiene, seguransa ba ai-han, no mós aprezentasaun kona-ba hahán ho di’ak.

Helena Hendrique Xavier Gomes, na’in ba restaurante Uma Na’in, kontente tanba esforsu la saguati no rezultadu hatudu sai primeiru lugar.

“Ha’u la sente katak previléjiu ida ne’e atu fó mai, maibé tanba ha’u-nia maluk sira hosi ha’u-nia munisípiu apoia ha’u, no mós Ministériu Turizmu ho sira-nia ekipamentu hodi ajuda tebes ha’u. Sira hotu apoia ha’u, ha’u mesak sei labele halo buat ida”, Helena espresa nia ksolok ne’e.

Aléinde ne’e, kontente tebes tanba Governu iha hanoin hodi realiza atividade ne’e hodi komemora aniversáriu 20 Loron Konsulta Populár.

Iha kompetisaun ne’e, primeiru vensedór hetan valór osan hamutuk $900, segundu $700, terseiru $500, kuartu vensedór husi munisípiu Kovalima mak restaurante Holsa hetan osan $450, vensedór dalimak hosi munisípiu Ermera ho valór osan $300 ho sestu vensedór husi munisípiu Manatutu mak restaurante Loro Sa’e ho valór osan $250.

Manán-na’in husi restaurante sira iha nasionál, primeiru lugar hosi Dili Institute of Technology (DIT), daruak restaurante Linivon no datoluk hosi Caritas Dioseze Dili.

Ba vensedór sira hosi masionál ne’e nia valór osan ne’ebé hetan hanesan ho vensedór sira husi munisípiu. Ba vensedór sira tantu ida ne’ebé la manán Komisaun Organizadora atribui hotu sertifikadu.

Notísia relevante : Sabór Hahán Timór Susar Atu Deskreve

Jornalista : Antónia Gusmão