Diretór DNTT, Natalino de Rosario. Imajen Egas Cristovão.

DILI, 26 agostu 2019 (TATOLI)-Diretór Nasionál Transporte no Terrestre (DNTT) Ministériu Transporte no Komunikasaun (MTK), Natalino do Rosário, hatete DNTT planeia ona ba tinan oin atu tau programa prioridade ida hanesan kontrolu ba veíkulu hodi haree liu ba karreta sira ne’ebé halo operasaun kleur ona ho kondisaun la di’ak, nune’e sei bandu hodi labele sirkula.

“Tanba saida maka ita nian karreta sira ne’ebé maka kondisaun aat ona, maibé sei lori pasajeiru? Tanba ita seidauk iha regulamentu ka baze legál ida atu regula ida ne’e”, Natalino do Rosario afirma iha Balidi, ohin.

Nia dehan kuandu transporte públiku ida hanesan bis, mikrolete no taksi halo rejistu ka halo lisensa ba operasaun, nian durasaun iha tempu tinan sanulu nia laran. Hafoin tinan sanulu viatura públiku sira ne’e labele halo sirkulasaun tanba nia prazu operasaun hotu bazeia ba durasaun tempu no kondisaun karreta nian no bá halo rejista fali husi viatura públiku ba privadu tanba karreta ne’e la permite ona.

“Maibé ba regulamentu ida hanesan ne’e ita nian la eziste, tanba ne’e agora DNTT halo ona pedidu ba diresaun jerál transporte no komunikasaun atu halo revizaun ba diploma ministeriál balun hodi nune’e bele halo regulasaun ba transporte tuan sira atu labele halo tan operasaun”, katak.

Nune’e nia husu parte tékniku MTK atubele kria fali diploma ministeriál balun liuhusi halo revizaun ba dekretu ministeriál MTK nian oinsá haree liu kona-ba operasaun veíkulu sira. Nune’e, DNTT bele kaer hanesan baze legál ida bele halo regularizasaun ho rigór.

Tanba ne’e maka MTK rekruta ona asesór ida hodi apoia iha DNTT atu haree ba kestaun regulamentu sira ne’e.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here