Feira artezanatu Ataúru ne'ebé organiza husi Empreza Di'ak.

DILI, 26 agostu 2019 (TATOLI) –Grupu Artezanatu lima kompostu husi munisípiu lima hanesan Munisípiu Lautem, Manufahe, Dili, Viqueque no Rejiaun Administrativu Espesiál Oekuse Ambeno (RAEOA) kompete iha eventu Festivál Kulturál Rezisténsia Populár (FKRP).

Munisípiu Lautem reprezenta husi Grupu Asalino, Manufahi reprezenta husi Grupu Lafahek Art no Hadomi Kultura Timor, Viqueque reprezenta husi Grupu Otas Foun, Dili reprezenta husi Grupu Haburas Kultura husi Atauro no husi RAEOA reprezenta husi Grupu To’u Tanuan. Grupu sira husi munisípiu ne’e grupu artezanatu ne’ebé tama ona iha selesaun husi grupu seluk iha nivel munisípiu.

“Sira mai aprezenta iha Dili ne’e halo ona selesaun tan entaun grupu artezanatu limade’it mak partisipa ne’e tanba iha posibilidade ona durante ne’e sempre moris ho atividade ne’e,” informa Koordenadór Virgílio Smith ba jornalista sira iha Sentru Konvensaun Dili (CCD-sigla portugés), domingu (25/08/2019).

Nia akresenta, grupu sira ne’e agora daudaun reprezenta sira-nia munisípiu. Ne’e duni eventu importante ida mak sira enxe daudaun ne’e mak festivál aprezentasaun Kulturál Rezisténsia Populár. “Entaun kada grupu sira ne’e tenke hatudu saida mak sira iha, tanba ne’e kompetisaun, depois komisaun sira sei avalia kada grupu sira ne’ebé di’ak liu mak sei sai vensedór”.

Grupu artezanatu lima ne’e, tuir Koordenadór Virgílio Smith, agora kompete daudaun no akompañadu husi kada koordenadór sira ne’ebé mai husi governu.

“Ita-nia grupu sira ne’e iha koordenadór ne’e mai husi MTCI (Ministériu Turizmu, Komérsiu no Indústria-sigla portugés). Sira mak akompaña grupu sira ne’e, hahú kedas husi munisípiu to’o mai iha Dili, tan ne’e grupu sira ne’e nakonu ona ho bukae,” nia konsidera.

Notísia relevante:Governu Aloka Osan 1,2 Millaun Ba Eventu 30 Agostu

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here