Ministru Negósiu Estranjeirus no Kooperasaun Dionísio da Costa Babo Soares. Imajen: António Gonçalves

DILI, 23 agostu 2019 (TATOLI) – Prezidente Repúblika (PR), Francisco Guterres ‘Lú Olo’ bolu Ministru Negósiu Estranjeiru no Kooperasaun, Dionísio da Costa Babo Soares hodi ko’alia kona-ba lista embaixadór Timor-Leste ne’ebé seidauk simu pose.

“Prezidente Repúblika bolu ha’u mai atu ko’alia kona-ba lista embaixadór sira nian, no PR hato’o hanoin balun katak atu ba reprezenta ita nia rain iha li’ur, tenke hatudu imajen nasaun nian,” tenik Dionisio Babo ba jornalista iha Palásiu Prezidensiál, Bairru-Pité, sesta ne’e.

Nia dehan, biban ne’e, Xefe Estadu husu Governu atu tau atensaun maka’as hafoin hili sidadaun ida hodi ba reprezenta nasaun iha estranjeiru.

Notísia Relevante: PM Taur Husu Ona MNEK Hadi’a Lista Embaixadór Pendente

Governante ne’e sei lori hanoin PR nian, hodi hato’o ba Primeiru-Ministru, Taur Matan Ruak hodi haree fila fali naran hirak ne’ebé tama ona iha lista maibé seidauk hetan pose.

“Númeru ida uluk ne’e mantein hela, hafoin mak ita haree fali hodi identifika karik fatin balun ita haree sira-nia mandatu besik hotu ona no sira fila fali mai ita tenke haree fali ema balun hodi troka, maibé lista sira ne’e laiha mudansa,” nia haklaken.

Nia hatutan, iha enkontru ne’e, PR la ko’alia atu halo mudansa ba lista refere maibé fó hanoin de’it ba Governu tenke tetu didi’ak ema ne’ebé atu sai embaixadór.

“Prezidente Repúblika fó hanoin de’it oinsá bele tau ema sira ne’ebé iha kareira, tanba sira na’in-tolu foin ba ne’e ema kareira hotu. Espera katak ita sei haree ema balun tan, tanba lei rejime kareira Ministériu Negósiu Estranjeiru no Kooperasaun nian, iha artigu 40 mós la taka dalan ba ema polítiku sira tama. Ida ne’e depende ba Governu,” nia subliña.

Lista Kandidatura Embaixadór sira ne’ebé Governu manda ba PR hamutuk na’in-16, maibé foin na’in-3 mak hetan pose.

Entretantu iha loron 13 agostu, Xefe Estadu fó pose ona ba Embaixadór Timor-Leste na’in-tolu hanesan Olímpio Branco nu’udar Embaixadór ba Brazíl, hodi troka Embaixadór Gregório de Sousa, Isílio Coelho nu’udar Embaixadór ba Estadu Unidu Amérika (EUA), hodi troka Embaixadór Domingos Sarmento Alves no Lisualdo Gaspar nu’udar Embaixadór ba Nova Zelándia hodi troka Embaixadór Cristiano da Costa.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here