Atividade Marça de Amor iha Oé-Cusse, iha ámbitu komemorasaun Tinan 20 Loron Konsulta Populár no Misaun INTERFET iha Timor-Leste, hahú hosi Ponte Noefefan. Imajen: Cipriano Colo

OÉ-CUSSE, 23 agostu 2019 (TATOLI) – Komemorasaun Tinan 20 Konsulta Populár no Misaun INTERFET iha Timor-Leste, povu Rejiaun Administrativa Espesiál Oé-Cusse Ambeno (RAEOA) hala’o atividade Marça de Amor, hahú husi Ponte Noefefan.

Molok hahú marsa, Komisaun Organizadora fahe númeru sorteiu ba partisipante sira, atu ida-idak koko sorte ba prémiu ne’ebé komisaun prepara ona.

Atividade marsa ne’e hahú iha tuku 8:00 dader no loke direta hosi Prezidente autoridade RAEOA-ZEESM interinu, Arsénio Paixão Bano, no durante marsa povu hananu Timor nian to’o ramata iha tuku 10:00, iha área Sentru Aprendizajen no Formasaun Edukativa (CAFÉ-sigla portugés), iha Bairro 1 de Maio Palaban.

Arsénio Bano hateten nia parte eziste ona marsa oioin iha mundu, no ohin iha ámbitu loron boot iha Oé-Cusse, hahú ho atividade Marça de Amor ho objetivu atu eduka povu kona-ba valór rezisténsia.

Tuir planu, iha loron ne’e sei iha mós reflesaun no kalan kultura ne’ebé sei sunu fogeti.

Atividade ne’e hetan seguransa másimu husi Polísia Nasionál Timor-Leste (PNTL) RAEOA no Komponente Navál FALINTIL-Forsa Defeza Timor Leste (F-FDTL).

Iha seremónia ne’e partisipa mós eis Prezidente Autoridade, Marí Bin Amude Alkatiri, Sekretáriu Rejionál sira, Autoridade lokál, funsionáriu RAEOA, estudante balun no povu Atoni-oan.

Autoridade Bandu Dada Bandeira CNRT

Iha marsa ne’e, Prezidente Autoridade RAEOA interinu, Arsénio Bano, bandu populasaun dada bandeira Conselho Nacional da Resistência Timorense (CNRT) no karik dada tenke lori ho bandeira nasionál Repúblika Demokrátika Timor-Leste (RDTL).

“La interese, joven sira atu espresa sira nia sentimentu oinsá, maibé importante labele politiza loron istóriku”, dehan Arsénio ba Agência TATOLI.

Entretantu, Susilo Hadi, joven ne’ebé kaer bandeira CNRT rezisténsia (la’ós bandeira CNRT partidu ida agora) sente triste tanba Autoridade bandu, maibé ba nia laiha problema karik ida ne’e mak regra.

“Ba ha’u la iha problema, karik ida ne’e mak Autoridade ninia regra. Tanba ne’e sira haruka atu lulun bandeira ne’e, ha’u mós lulun”, nia haktuir.

Nune’e mós, José Neno sente triste tanba bainhira lori bandeira Concelho Nacional da Resistência Timorense ( CNRT), maibé labele dada iha komemorasaun tanba Autoridade la fó autorizasaun.

“Ami hadomi bandeira ne’e tanba durante kampaña ba loron Konsulta Populár iha 1999 ami uza duni bandeira ne’e, maski tama iha forsa Indonézia nia leet”, nia dehan.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here