Ministra Edukasaun, Juventude no Desportu Dulce de Jesus Soares .Imajen/TATOLI

DILI, 23 agostu 2019 (TATOLI)- Ministra Edukasaun Juventude no Desportu (MEJD), Dulce de Jesus Soares halo aprezentasaun ida iha Konsellu-Ministru kona-ba PRO-projetu portugés, hanesan parseria ida entre MEJD, INFORDEPE (Institutu Nasionál Formasaun Dosente no Profisionál Edukasaun) no Camões, institutu kooperasaun língua.

Projetu ida atu kontribui ba konsolidasaun husi sistema edukativu Timor-Leste nian liuhusi apoiu ba setór formasaun profisionál no kontinua husi pesoál dosente husi sistema edukativu ensinu superiór.

Projetu ida atu troka programa Formar+, ne’ebé mak termina iha loron 31, dezembru tinan 2018 no sei ezekuta entre tinan 2019 no 2022. Liuhusi Projetu PRO-Portugés, ne’ebé sei fornese 520 oras husi formasaun ba media husi profesór 4.300 kada tinan no sei iha posibilidade, ba prazu tinan tolu, ne’ebé mak profesór sira husi sistema edukativu nasionál atinje nivel B2 husi profisiénsia linguístika iha lian portugés to’o finál 2022.

Ministra Dulce de Jesus Soares informa katak MEJD sei prevee orsamentu 14 millaun hodi realiza formasaun língua portugeza ba profesór sira iha Timor-Leste (TL).

“Ita hotu hatene katak agora daudaun ita-nia profesór sira foin mak hetan nivel A1. Ne’e duni, ita hanoin atu kontinua tan formasaun lian portugés A2 no B1 atu nune’e ita-nia profesór sira bele hasa’e liután sira-nia kapasidade,” informa Ministra, Dulce de Jesus Soares ba jornalista Ajénsia TATOLI, hafoin partisipa reuniaun Konsellu-Ministru, sesta ne’e, iha Palásiu Governu.

Governante ne’e informa, Oitavu Governu Konstitusionál liuhusi MEJD halo ona akordu kooperasaun ho Instituto Camões, Portugal, atu bele realiza planu formasaun ne’e. “Tanba presiza duni ema ne’ebé iha abilidade ka esperiénsia duni mak bele realiza formasaun”.

Tanba formasaun ne’e rasik, tuir ministra katak polítika ministériu hakarak lori ninia nivel ne’e tuir padraun Eropa nian. Ne’e duni durante tinan tolu hahú husi 2020-2022 ne’e ministériu tenke prodús ona profesór lian Portugés ho abilidade no kapasidade ida di’ak liu tinan kotuk.

“Ita prevee orsamentu ba formasaun tinan tolu ne’e hamutuk 14 milloens atu bele aselera formasaun ne’e tuir padraun mínimu europeia nian atu profesór sira bele uza portugés ho di’ak iha aula laran,” tenik Ministra Dulce de Jesus.

“Ne’e duni, aprezentasaun planu iha enkontru Konsellu-Ministru, hetan ona promulgasaun ba programa ne’e no tinan oin programa ne’e bele implementa ona tuir planu ne’ebé iha ona,” konklui Ministra Dulce de Jesus.

Jornalista:Tomé Amado

Editór     : Rafy Belo

HAKEREK NO HATÁN

Please enter your comment!
Please enter your name here