Asesór Prinsipál MTKI, Jacinto Rigoberto (Klaran) hamutuk ho Komisaun Organizora Hala’o Konferénsia Imprensa kona-ba Feira Gastronomia iha Salaun Sentru Konvensaun Dili (CCD). Sesta,(23/08/2019). Imajen/Tatoli.

DILI, 23 agostu 2019 (TATOLI)-Ministériu Turizmu, Komérsiu no Indústria (MTKI) sei realiza feira gastronomia hodi komemora aniversáriu ba dala-20 Loron Konsulta Populár (1999-2019) no misaun INTERFET (Forsa Internasionál ba Timor-Leste).

Liuhosi konferénsia ba imprensa ne’ebé hala’o iha salaun enkontru Sentru Konvensaun Dili (CCD, sigla portugés), Asesór Prinsipál MTKI, Jacinto Rigoberto, hatete tinan-tinan MTKI liuhosi Diresaun Jerál Emprendimentu Atividade Produtu Turístiku halo feira ne’e nu’udar produtu turístiku Timor-Leste nian hodi promove produtu lokál.

“Feira ida ne’e sei hala’o iha loron 27 fulan ne’e (iha CCD, tuku rua loraik). Aléinde feira gastronomia realiza mós kompetisaun ba te’in-na’in sira hamutuk restaurante no otél 50 hosi Timór laran tomak. Feira ne’e nu’udar mós atividade anuál MTCI nian, maibé iha tinan ida ne’e espesiál uitoan tanba inklui mós iha atividade aniversáriu 20 Konsulta Populár no misaun INTEFET nian iha Timor-Leste”, Jacinto Rigoberto afirma.

Relasiona ho atividade ne’e MTKI apela ba povu Timor-Leste atu partisipa iha feira no asiste hamutuk kompetisaun hosi te’in-na’in sira ne’ebé mak te’in produtu lokál nu’udar poténsia turístika ida iha Timór.

“Tanba ita hatene katak nasaun barabarak turista sira bá vizita, sira la’ós bá de’it haree paizajen ne’ebé mak furak, maibé sira mós hakarak atu sente no mós koko ita ninia produtu ne’ebé sei orgánika tebetebes. Ida ne’e maka sai hanesan poténsia boot atu atrai ita-nia turista sira mai Timor-Leste”, afirma Rigoberto.

Produtu ne’ebé sei aprezenta iha feira gastronomia ne’e maioria hahán lokál, ne’ebé sei lori hosi te’in-na’in sira husi munisípiu 12 inklui Rejiaun Administrativa Espesiál Oekusi-Ambenu (RAEOA).

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here