Prezidente Repúblika, Francisco Guterres Lú Olo. Imajen: TATOLI

DILI, 22 agostu 2019 (TATOLI)—Prezidente Repúblika, Francisco Guterres Lú Olo, kinta ne’e iha Palásiu Prezidente Nicolau Lobato, Bairru Pité, Dili, asina ona Rezolusaun Parlamentu Nasionál ne’ebé ratifika Tratadu Fronteira Tasi-Timor entre Timor-Leste no Austrália no ohin sei haruka ba Parlamentu Nasionál (PN).

Tuir prosesu babain, Xefe Estadu esplika, Parlamentu Nasionál mak sei hato’o ba Jornál Repúblika.

Lee mós: Aprovasaun Lei Haat Sei Hetan Benefísiu Hosi Ratifikasaun Tratadu Foun

“Tuir Konstituisaun RDTL artigu 85 alínea a, ha’u hateten fila fali, kompeténsia Prezidente Repúblika nian mak  asina no haruka publika Tratadu ne’e iha Jornál Repúblika,” dehan Lú Olo ba jornalista sira liuhusi konferénsia ba imprensa.

Nia esplika, hafoin publika ona iha órgaun ofisiál ida ne’e, mak Tratadu ne’e hahú iha forsa no efikásia lei nian.

Kona-ba Dekretu rua hosi Parlamentu Nasionál ne’ebé iha relasaun direta ho Tratadu ne’e, hanesan Lei Tributária no Rejime Laborál no Migratóriu Espesiál Aplikável ba Projetu Bayu-Undan, Prezidente Repúblika la haree problema iha alterasaun ne’ebé Parlamentu Nasionál halo, tanba ne’e,  promulga ona no tuir prosesu babain,  sei haruka ba Parlamentu Nasionál hodi hato’o ba Jornál Repúblika.

Diploma lejizlativa  ne’ebé  iha relasaun ho Tratadu ne’e sei hahú aplika hafoin Tratadu ida ne’e  tama ona iha órden jurídika Timor-Leste nian.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here