Estudante Pré-eskolár Komunitáriu Abo Lir. Foto: Intelektuál “Solidariedade Rohan Laek”-SRL.

DÍLI, 22 agostu 2019 (TATOLI)-Universidade Nasionál Timor Lorosa´e (UNTL), Fakuldade Edukasaun, Arte no Umanidade (FEAU) estabelese ona Departamentu Ensinu Pré-Eskolár no prosesu aprendizajen hahú ona.

 Dekana FEAU, Ana Cristina Martins informa katak departamentu ne´e nia prosesu aprendizajen durante semestre ida ona no dosente sira ne´ebé mak hala´o prosesu aprendizajen ne´e kuaze mai husi Universidade Minho, Portugal.

“UNTL halo kooperasaun ho Universidade Minho Portugal no agora daudaun ninia prosesu ensinu da aprendizajen tama ona iha semester ida,” hateten Dekana Ana Cristina  ba jornalista Ajénsia TATOLI iha ninia Gabinete FEAU-UNTL, Liceu kuarta (21/08/2019).

Akadémika UNTL dehan, Departementu Ensinu Pre-Eskolár ne’e presiza tinan haat atu prodús ninia graduante sira. Ne’e duni, kurríkulu inklui dosente sira Universidade Minho mak responsabiliza to’o graduasaun faze dahuluk. UNTL prepara de’it ninia kondisaun atu dosente sira bele hala’o atividade ne’e.

Portantu, orinetasaun bázika ne’ebé UNTL toma reponsalblidade mak hakarak atu prodús profesór ka dosente espesífiku atu bele hanorin fali labarik sira iha nível báziku.

“Ita hatene katak to’o agora iha Timor-Leste seidauk iha profesór espesífiku ida atu hanorin labarik Pre-Eskolar (TK) sira. Tan ne’e, liuhusi kooperasaun ne’ebé Magnífiku Reitór halo ho Universidade Minho iha Portugal ne’e hodi aselera prosesu konstrusaun estadu iha área Edukasaun”.

“Tanba atu hanorin labarik ida ho nível báziku pré-eskolár presiza duni profesór espesífiku. Ne’e duni, UNTL prepara daudaun ona no tinan haat oin bele hetan ona ninia rezultadu,” nia garante.

Notísia relevante:UNTL ho U-Minho Sei Institusionaliza Formasaun Profesór Ensinu Pré-eskolár

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here