Komandante Unidade Polisia Militár, Majór Abel da Costa Xavier "NIKI". Imajen/Eugénio Pereira

DILI, 22 agostu 2019 (TATOLI) – Operasaun Konjunta iha fronteira Batugadé, Munisípiu Bobonaru, detein joven na’in 16 ne’ebé tenta haku’ur ilegálmente ba Indonézia.

Operasaun Konjunta ne’e, envolve FALINTIL-Forsa Defeza Timor-Leste (F-FDTL) husi Unidade Polísia Militár (PM), Polísia Nasionál Timor-Leste (PNTL) husi Unidade Polísia Fronteira, Intelijénsia, Servisu Alfándega, Imigrasaun ho Unidade Polísia Marítima (UPM).

Komandante PM, Majór Abel da Costa “Niki”, hateten joven na’in 16 ne’e detein tanba halo tentativu atu hakat liu fronteira ilegálmente ho grupu, inklui lori ho atributu arte marsiál balun nian.

“Se joven sira ne’e la’o la ho grupu no la lori atributu grupu ilegál nian karik, ami la kaer,” informa Majór Niki, ohin, ba TATOLI iha nia knaar fatin, Kuartél Polísia Militár, iha Kintal Boot.

Nia konsidera joven hirak ne’e tama ilegál, tanba sira la’o ho grupu kerdizér sira iha objetivu ruma ba Indonézia, se la’o ida ka rua ninian, operasaun konjunta labele kaer sira.

Hatán kona ba joven na’in 16 lori dokumentu ofisiál sira hanesan pasaporte, komandante Polísia Militár ne’e lakohi fó komentáriu tanba prosesu investigasaun sei la’o hela no depois mak hatene katak sira komete erru balun ka la’e.

Daudaun ne’e joven  na’in 16 detein hela iha sela polísia Bobonaru hodi hein prosesu investigasaun.

Majór Niki  apela ba joven sira iha Timor laran atu kontinua hakmatek iha fatin, lalika halo movimentasaun tun sa’e iha fronteira ho ilegalmente.

Nia dehan iha semana kotuk liu ba Polísia Indonézia kaer ona timor ona na’in 19 ne’ebé mak laiha dokumentu ofisiál hanesan pasaporte iha area Metamauk, subdistritu Kobalima, Malaka, Timor Osidentál.

Jornalista : Domingos Piedade Freitas

Editór       : Francisco Simões

1 KOMENTÁRIU

  1. Ema Neebe akat Liu fronteira Sem documentos presisa investiga atu tuir prosesu legal ruma Tamba nasaun vizinhos Indonesia labele hatene fraqueza institusi daun defeza no serguransa no alfandega iha fronteira
    Tamba Durante Nee Ita observa parte defeza no serguransa no alfandega Servisu la dun profesional Tamba cidadaun ilegal lori ka hatama Sasan ilegal barak Liu ho Ida Nee presisa investiga seriu atu bele hatene lolos Ema Sira ne Nia interesaun hakat Liu fronteira ne

HAKEREK NO HATÁN

Please enter your comment!
Please enter your name here