Ministru Obra Públika, Salvador Soares Dos Reis Pires Asina Kontratu Ho Kompañia Internasionál Rua Atu Halo Estudu Ba Projetu Bee Moos Nian. Salaun Konferénsia Hotel Ramelau Aimutin. Dili, Kinta (22/08/2019). Imajen/Tatoli

DILI, 22 agostu 2019 (TATOLI)–Governu liuhosi Ministru Obra Públika (MOP), Salvador Eugénio Soares dos Reis Pires, asina kontratu ho Kompañia internasionál  husi Thailándia ho Koreia atu halo estudu pre-viabilidade no estudu viabilidade ba projetu dada bee-moos husi  mota Rai-Laku no mota Gleno, Munisípiu Ermera mai Dili.

“Ami asina kontratu ho kompañia rua, atu halo estudu bee iha mota Rai-Laku ho mota Gleno oinsá atu halo barajen hodi prodús bee-moos atu fornese mai Dili no mós estudu ba kondisaun bee rai nian oinsá ita harii fasilidade hodi retein udan-been atu enxe fali ba ita-nia rai”, Ministru Salvador afirma hafoin asina kontratu ho Kompañia sira, iha Otél Ramelau, ohin.

Kompañia rua ne’e maka Team Consulting Engineer and Management PCL, Thailandia in JV With ATT, consultations Company limited, Thailand and in association With CQ2, Engineering Consultancy ne’ebé  konsórsiu ho Kompañia Diversu Unipessoal,Lda inklui Donsung Enegineering Co. Ltd, Korea and in association ne’ebé konsórsiu ho Kompañia Kai Watu Kmanek Consultan Unipessoal, Lda.

Ministru akresenta kompañia hirak ne’e atu halo estudu pre-viabilidade ba  projetu  kondisaun bee rai nian, oinsá kria fasilidade hodi retein udan been  ba enxe fali rai iha kapitál Dili, nune’e mós atu halo estudu viabilidade mota Rai-Laku iha Glenu, atu oinsá halo barajen hodi prodús bee-moos atu fornese mai Dili.

Kompañia internasionál rua, manán konkursu liuhosi prosesu Komisaun Nasionál Aprovizionamentu (CAN-Sigla Portugés) ho orsamentu millaun $1, ho durasaun estudu, hahú hosi agostu 2019 to’o janeiru 2020 (durante fulan lima) ho distánsia hosi Ermera mai Dili kuaze kilómetru 30-resin.

Ministru esplika planu integradu ba  estudu ne’e foku liu ba produsaun bee atu fornese bee ho kualidade no saúdavel ba komunidade sira iha Dili. Tanba produsaun bee Dili depende  de’it ba perfurasaun ho estasaun 26  husi bee ne’ebé iha rai okos maibé la sufisiente.

“Ita hanoin estudu viabilidade maka fó rezultadu di’ak, ita bele avansa ba dezeñu enjeñaria detalada atu halo barrajen iha mota Rai-Laku, Postu Administrativu Glenu, Munisípiu Ermera,  atu lori bee mai Dili”.

Tanba ne’e, ministru husu ba kompañia enstrajeiru no nasionál sira ne’ebé halo konsórsiu atu uza nia abilidade tomak hodi bele ajuda Governu hodi atinje nia objetivu atu fornese bee-moos ba populasaun durante 24 oras nia laran.

Nia salienta katak sistema produsaun bee iha Dili, kada loron kuaze prodús  litru millaun 52 ne’ebé fornese ba populasaun tuir sensu 2015 hamutuk 267.000, distribui bee ba uma-kain kada loron litru 500, ida ne’e presiza aumenta produsaun bee kada loron litru millaun 40 atu fornese ba abitante sira iha Dili.

Parte seluk, iha estudu ne’e la’ós de’it ba bee-moos, maibé koopera mós ho estasaun elétrika atu haree enerjia renovavel ne’ebé posibilidade mós bele prodús 50 MW husi mota Rai-Laku no Gleno iha Ermera”.

Iha fatin hanesan,  Prezidente Autoridade Munisipiu Ermera, José Martinho dos Santos Soares, prontu apoia Polítika Governu atu dada rekursu bee husi mota Rai-Laku no mota Gleno, Munisípiu Ermera atu fornese mai vila-laran.

“Ami la kontra ami prontu kolabora programa Governu nian tanba projetu ne’e mak la’o duni iha Ermera, ami mós sei hetan benefísiu”, katak.

Tanba ne’e, nia dehan komunidade hosi Munisípiu Ermera pontu asegura estudu rua ne’e bele la’o ho susesu atu apoiu Governu hodi atinje nia planu ba Objetivu Dezenvolvimentu sustetável (ODS) ne’ebé iha Planu Estratéjiku Dezenvolvimentu Nasionál (PEDN).

Jornalista : Florencio Miranda Ximenes

Editora     : Maria Auxiliadora

HAKEREK NO HATÁN

Please enter your comment!
Please enter your name here