Estudante husi kada eskola ne´ebé partisipa iha sertame. Foto TATOLI: Nelia Fernandes

DILI, 21 agostu (TATOLI)- Edukasaun Munisípiu Dili hamutuk Centro Nacional CHEGA (CNC) realiza atividade sertame faze eliminatóriu ho tema “Das Cinzas à Reconsiliação e Desenvolvimento Nacional” ba eskola sekundária sira kona-ba istória hodi komemora tinan 20 aniversáriu Konsulta Populár no Misaun INTERFET Mai Timor-Leste.

“Programa komemorasaun tinan 20 Konsulta Popular ida ho karakter edukativu iha elaborasaun atividade sira ne’e, hanoin katak ita-nia matéria ida ne’ebé presiza atu introdús ba jerasaun foun sira, liuliu eventu istóriku sira iha 1999 nian,” hateten Koordenadór Seksaun ba programa, Hugo Fernandes ba jornalista sira hafoin ramata abertura atividade sertame iha Salaun Ministériu Edukasaun Munisipiu Dili, Comoro, ohin.

Koordenadór Seksaun ba Programa, Hugo Fernandes hateten, Centro Nacional CHEGA hamutuk ho Ministériu Edukasaun Juventude Desportu (MEJD) elabora matéria sira, ne’ebé relasiona ho eventu sira 1999. “Para depois bele uza matéria ne’e, primeira atu introdús ba ita-nia jerasaun foun sira no mós parte ida atu komemora loron tinan 20 ida ne’e”.

Koordenador Hugo Fernandes informa, alende matéria 1999 nian iha matéria sira seluk, ne’ebé ministériu edukasaun elabora nu’udar parte ida husi disiplina istória ne’ebé hanorin ona iha eskola sekundária sira. “Entaun, ne’e ohin ita ofsialmente lansa iha Dili, maibé, iha munisipiu sira seluk ho mós iha RAEOA komesa faze eliminasaun ba matéria atividade sertame ho nia konteúdu istória sira Timor nian, ne’ebé hakarak introdús, sensibiliza.

Iha biban ne’e, Koordenadór Hugo Fernandes katak, iha atividade sertame ne’e atu hanorin ba jerasaun foun sira, oinsá mak akontese tinan 24 nia laran durante Timor iha okupasaun Indonézia no saída mak akontese iha tinan 20 liu ba. “Nune’e jerasaun foun sira moris, liuliu ba eskola sekundária moris depois 1999 ne’e sira bele hatene”.

Sertame ne’e rasik partisipa hosi kuaze 160 eskola sekundária e eskola vokasionál iha Timor laran tomak. “Ohin iha Dili nian, iha munisipiu 11 seluk ho RAEOA, entaun nia nivel eskola munisipiu hotu tiha tenke hetan manan na’in 1, manan na’in ne’e orsida sei ba kompete ho munisipiu seluk ho RAEOA, ne’e akontese iha 28 no 29”.

“Entaun iha nivel munisipiu ne’e iha duni primeiru segundu lugar, maibé primeiru ne’e de’it mak sei avansa ba iha 28 no 29 agora, para kontra fali manan na’in husi munisipiu sira seluk,” tenik nia.

Nia hateten, Prémiu primeiru MEJD mak sei fó ho komisaun organizadora informa de’it sertifikadu apresiasaun. “Ne’ebé manan na’in loloos, ida kampiaun nasionál nia sei ba simu prémiu sertifikadu iha 30 agostu kalan iha Tasi-Tolu”.

Koordenadora seksaun ba programa, informa tan, Seidauk hatene total orsamentu. “Serteza sira sei hetan sertifikadu husi Prezidente komisaun organizadora”.

Nia informa tan katak, Orsamentu ba komemorasaun ida ne’e governu nian, maibé iha mós hanesan atividade sira ne’e balun mós partisipasaun husi ministériu sira, ajénsia sira, ne’ebé sira rasik mós iha kedas osan sira.

Entertantu, konkorrente ba sertame  mak estudante sira husi eskola sekundária sira hanesan, Eskola Sagrado Coração de Jesus, Colégio Paulo VI, Seminário Menor, São José Operário, Cristal, no seluk tan no asiste direta husi diretór eskola, profesór no mós estudante sira.

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here