Tribunál, MP ho Defeza inklui suspeitu sira nebe polisia kaptura , ohin, halo inspesaun lokál tanba pratika atividade arte marsiál. Imajen/Domingos Piedade Freitas

DILI, 21 agostu 2019 (TATOLI) – Tribunal Distritál Dili (TDD), ohin, hasai desizaun  hodi aplika Termu Identidade Rezidénsia (TIR) ba suspeitu na’in ualu (mesak joven de’it)  ne’ebé kaptura husi Polisia Nasionál Timor-Leste (PNTL) husi Batallaun Orden Publika (BOP) iha Bairru-Pité, Dili, Domingu kalan (18/08/2019).

Polisia BOP kaptura joven na’in hirak ne’e tanba deskonfia halo treinu subar atividade arte marsiál nian, maibé tuir Defeza ne’ebé fó asisténsia legal ba suspeitu sira katak, la’ós treinu atividade arte marsiál, maibé kalan boot sira sai ba fase aqua galon mamuk mak BOP sira duni tuir kaer sira iha sira nia uma no prende sira nia atributu ne’ebé pertense ba grupu arte marsiál balun ne’ebé sira rai no prezerva iha sira nia uma laran.

Suspeitu sira ho inisiál JACD, JC, CD, BP, DF, ES, FJG no DLS kaer  iha tuku 11:00 kalan  Otl.

Hafoin submete ba primeiru interrogatóriu iha Tribunal Distritál Dili (TDD), Acaçio Guterres, nu’udar defeza hateten, momentu ne’ebá suspeitu sira nee fase aqua galon hodi hala’o atividade servisu uma nian, maibé tanba atividade servisu fora husi oras servisu nian maka deskonfia husi Polisia BOP katak treinu subar mak konsege duni kaptura sira no rekolla atributu balun iha sira nia uma uma laran.

Atu bele justifika atividade treinu ne’ebé BOP deskonfia, Tribunal hamutuk ho Ministériu Públiku, Defeza no suspeitu sira tuun diretamente ba halo inspesaun lokál. Maibé,  la nota halo atividade treinu arte marsiál no konsege hetan de’it mak  lata mamuk serveja ho marka Diabolu nian iha saku nanotak ida hamutuk lata 22 no halo inspesaun ba uma laran hetan duni atributu arte marsiál balun ne’ebé mak rai di’ak iha armáriu laran.

“Ohin, desizaun Tribunal aplika TIR hodi aprezenta periódika ba suspeitu sira, semana ida dala rua, ba sentru polisia tanba faktu sufisiente,” informa Acaçio Guterres ba ajénsia TATOLI iha TDD hafoin audiénsia primeiru interrogatóriu ba suspeitu sira.

Ba kazu nee, Ministériu Públiku promove krime ilísitu arte marsiaís no asosiasaun kriminoza ho pena prizaun tinan haat.

Motivu autór na’in ualu ne’ebé Interroga iha tribunal, tanba  viola lei númeru 5/2017 ne’ebé estadu kriminaliza kona-ba arte marsiaís nian.

Audiénsia nee prezide husi Juis, Ana Paula Fonseca, parte Ministériu Públiku reprezenta prokuradór estajiáriu, no suspeitu sira hetan asisténsia legal hosi advogadu privadu, Acaçio Guterres.

Jornalista          : Domingos Piedade Freitas

Editór                : Francisco Simões

HAKEREK NO HATÁN

Please enter your comment!
Please enter your name here