DILI, 21 agostu 2019 (TATOLI)—Asosiasaun Xineza Timor-Oan (ACCCTO—sigla Portugés), oras ne’e iha ninia membru hamutuk ema-na’in 10.000 (rihun sanulu).
Dadus ne’e fó sai hosi Prezidente ACCCTO, Kathleen Gonçalves, hafoin aprezenta misaun no vizaun hosi asosiasaun ne’e ba Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin.
Nia esplika, hanesan operadór ekonomia ida iha rai laran, ACCCTO ne’ebé harii iha Timor-Leste dezde tinan 1912, atualiza mós kona-ba atividade negósiu rai laran oras ne’e dadaun.
Prezensa ACCCTO iha Timor-Leste oras ne’e ho idade 107 ona, nu’udar organizasaun istóriku ne’ebé xineza sira husik hela ba beioan sira iha Timor atu kontinua dezenvolve to’o ohin loron.
Durante ne’e, ACCCTO halibur no tau-matan ba atividade negósiu oinsá sai perseiru hodi dezenvolve ekonomia rai laran, inklui defende membru sira-nia direitu.
Iha 28 setembru, ACCCTO sei komemora loron independénsia Xina nian, iha ne’ebé durante enkontru konvida mós Xefe Estadu atu partisipa iha serimónia importante ne’e.
Atu komemora loron ne’e, ACCCTO sei hala’o atividade hanesan dansa kultura iha salaun Xina Maromak, Bairro Formosa, Dili.
Kathleen hateten Prezidente Repúblika responde pozitivu tebe-tebes tanba durante estadia iha Timor-Leste, ACCCTO kontribui maka’as ba kresimentu ekonomia, kria kampu serbisu, halo negósiu no hamenus ki’ak.
Jornalista: Cipriano Colo
Editór: Xisto Freitas
