Estádio Municipio Ermera. Imajen/Tatoli

GLENO, 20 agostu 2019 (TATOLI) – Governu liuhosi Sekretaria Estadu Juventude no Desportu (SEJD), inaugura ona Estádiu Kafé Ermera.

Sekretáriu Estadu Juventude no Desportu, Nelio Isaac Sarmento, apela ba jerasaun foun sira hodi hatudu prestasaun di’ak iha atividade desportiva, nune’e bele hamorin Timor-Leste nia naran iha mundu internasionál.

Sekretáriu Estadu Juventude no Desportu, Nélio Isaac Sarmento. Imajen/Tatoli

“Ohin ita inaugura ona Estádiu ida ne’e, monu los iha loron istóriku FALINTIL ninian, ne’e hatudu katak espíritu hirak ne’ebé mak FALINTIL sira halo durante ne’e to’o ohin loron ita hamrik hanesan nasaun ida, entaun ita tenke hatutan hodi fó valór liuhosi prestasaun atleta sira hotu”, intervensaun Nelio Isaac, iha seremónia inaugurarasaun Estádiu Kafé Ermera, tersa ne’e.

Governante ne’e husu ba Ermera-oan hotu, atu uza Estádiu refere ho kuidadu tanba tinan oin sei utiliza ba jogu internasionál Komunidade País ho Lian Portugués (CPLP-sigla portugués) nian, ne’ebé Timor-Leste hanesan uma-nain.

Iha inaugurasaun ne’e hala’o mós lansamentu ba atleta hosi modalidade 12, ne’ebé sei reprezenta Timor-Leste iha jogu internasionál Sudeste Aziátiku (Sea Games), ne’ebé sei hala’o iha setembru tinan ne’e, iha Manila, Filipina.

Alende ne’e, intrega mós prémiu ba atleta hirak ne’ebé durante ne’e hatudu prestasaun di’ak iha jogu internasionál sira ne’ebé hamorin ona Timor-Leste nia naran.

Seremónia ne’e partesipa mós hosi membru Parlamentu Nasionál (PN) balun, eis Sekretáriu Estadu Alta Kompetisaun, Osorio Florindo, Prezidente Autoridade Munisípiu Ermera, José Martinho dos Santos Soares no populasaun Ermera.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here