iklan

DEFEZA

Presiza Valoriza Loron FALINTIL Hanesan Loron Nasionál

Presiza Valoriza Loron FALINTIL Hanesan Loron Nasionál

Prezidenti Republika halao pasarevista ba formatura iha selebrasaun Aniversariu FALINTIL ba dala-44 iha Kuartél Jenerál F-FDTL, Fatuhada, Dili, 20 Agostu 2019. Imajen/TATOLI

DILI, 20 agostu 2019 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL, sigla portugés), Majór Jenerál Lere Anan Timur, rekomenda ba Estadu, liu-liu Governu atu valoriza loron FALINTIL hanesan loron nasionál.

Notísia Relevante : Jornada FALINTIL ‘Haku’ur’ Dezafiu Oi-oin

Xefe Estadu Maiór Jenerál F-FDTL, Majór Jenerál Lere Anan Timur.Imajen/Antonio Goncalves

Lere Anan Timur nu’udar mós Komandante FALINTIL ida ne’ebé reziste iha ai-laran durante tinan 24 nia laran haree katak, selebrasaun loron FALINTIL ne’e hanesan fali loron ida ba de’it F-FDTL tanba Estadu seidauk valoriza hanesan loron nasionál.

“Sé hanesan loron nasionál karik Estadu ho Governu mak iha obrigasaun atu organiza selebrasaun loron ne’e. Tanba ne’e presiza tau atensaun atu Estadu bele valoriza loron FALINTIL hanesan loron nasionál,” afirma Lere Anan Timur, ohin, iha nia diskursu iha ámbitu selebrasaun loron FALINTL ba dala-44 iha Kuartél Jenerál F-FDTL, Fatuhada, Dili.

Lere mós hato’o nia preokupasaun kona-ba regulamentu iha Jardín Eroi, Metinaro, ne’ebé restu mortais saudozu FALINTIL sira nian ba haloot iha ne’ebá, maibé iha prosesu sira ne’e la marka prezensa husi órgaun Estadu, hanesan Prezidente Repúblika, Parlamentu Nasionál, Primeiru-Ministru ho membru Governu.

“Dala barak, ita haree restu mortais ne’ebé halo’ot iha ne’ebá no mós prosesu funerál veteranu sira nian, la iha prezensa husi membru governu no parlamentu nasionál,” Lere afirma tan.

Tuir nia haree durante ne’e veteranu sira balun ba reprezenta fali malu hodi partisipa iha prosesu funerál no haloot restu mortais iha Metinaru.

“Sei iha kongresu estraordináriu ne’ebé sei hala’o iha loron 1-2 fulan marsu tinan 2020, molok  sei selebra loron 3 fulan marsu hanesan loron veteranu. Ita sei foti kestaun lubuk ida ne’ebé ita sei hasoru iha ita nia moris loron-loron nian no aprezenta fó solusaun ruma,” tenik Lere Anan Timur.

Jornalista : Nelson de Sousa

Editór       : Francisco Simões

iklan
iklan

Leave a Reply

iklan
error: Content is protected !!