iklan

DILI

MKOTT Realiza Ezpozisaun Fotografia Kona-ba "Liña Mediana"

MKOTT Realiza Ezpozisaun Fotografia Kona-ba "Liña Mediana"

Joven ida haree hela ezpozisaun fotografia ne´ebé MKOTT sira organiza. Foto TATOLI: Nelia Borges

DILI, 20 agostu 2019 (TATOLI)-Movimentu Kontra Okupasaun Tasi Timor (MKOTT) realiza ezpozisaun Fotografia ho tema “Luta Naruk ba Liña Mediana” hodi komemora tinan 20 Konsulta Populár no mós kona-ba planu Governu Timor-Leste nian ho Austrália atu asina troka nota entedimentu entre país rua, liga ba tratadu fronteira marítima

Portavóz MKOTT, Tomas Freitas hateten, atividade ne´e MKOTT realiza hodi hatudu mós ba públiku kontribuisaun ki’ik husi movimentu ba nasaun, luta MKOTT nian iha liña mediana.

Portavóz MKOTT, Tomas Freitas

Luta foun ida MKOTT halo, depois luta ukun rasik aan hodi deside soberania, liuliu soberania tasi, fronteira nian, iha ne’ebé komponente hotu inklui ferik, katuas, juventude, estudante no sosiedade sívíl sira hotu hola parte iha demonstrasaun iha Embaixada Austrália nia oin.

“Hatudu katak ema hotu iha konsiente ezije liña mediana  nune’e mós hatudu katak luta husi 2002 to’o agora ne´e tempu naruk. Tanba ne’e, ida ne’e (tema) sai ba ami-nia tópiku atu hatudu ba povu tomak katak MKOTT hamutuk ho povu tomak hetan vitória,” hateten Portavós MKOTT, Tomas Freitas ba jornalista Ajénsia TATOLI, iha Asosiasaun HAK, Farol, Dili, tersa (20/08/2019).

Iha biban hanesan, Portavós MKOTT ne´e informa katak liuhusi atividade ezpozisaun ne’e atu gaña asinatura hodi apoiu solidaridade ba sidadaun Australianu nain rua, Bernard Collaery ho Witness Key, ne’ebé maka hetan ameasa husi Governu Austrália atu tama kadeia.

“Sira na´in rua ne’e importante tanba sira na´in rua maka ajuda prosesu Fronteira Marítima hodi Austrália hakarak tuur ho Timor-Leste negósia hodi deside ita-nia liña mediana,” nia konsidera.

Portavóz MKOTT, iha entrevista ho TATOLI, fó mós motivasaun katak: “Foin sa´e hotu  tenke iha esperansa katak nasaun ne’e sei bele sai di’ak ba oin, kualker luta ne’ebé ita fiar katak ita bele manan, komun nian, tenke hamriik iha oin para defende”.

Entretantu,  ezpozisaun ho tema “Luta naruk ba liña mediana” husi MKOTT ne´e loke ba públiku hahú husi loron 19 agostu to’o 31 agostu 2019.

Notísia relevante:MKOTT: Kazu Bernard Collaery Ho Witness K Parte Integrante Husi Luta Fronteira Marítima

Jornalista : Nelia Borges

Editór       : Rafy Belo

iklan
iklan

Leave a Reply

iklan
error: Content is protected !!