ESHANA presta omenajen ba FALINTIL. Foto TATOLI: Rafy Belo

DILI, 20 agostu 2019 (TATOLI)-Estudante 89 husi Universidade Nasionál Timor Lorosa’e (UNTL) kompostu husi Grupu Aventureiru Timor- Leste no Estudante Hadomi Natureza (ESHANA) termina sira-nia la’o ain husi Munisípiu Ainaru no Vikeke iha komemorasaun aniversáriu Forsa Armada Libertasaun Nasionál Timor-Leste (FALINTIL) ba dala 44 iha Kuartel Jerál FALINTIL- Forsa Defeza Timor-Leste (F-FDTL), Fatuhada, Dili.

Objetivu husi jornada ne’e hakarak presta omenajen ba eroi ne’ebé oferese ona sira nia isin no raan luta ba libertasaun rai no povu.

Koordenadór Grupu Aventura, Martinho da Costa, konsidera atividade ne’e atu hatutan espíritu ne’ebé eroi sira husik hela. Nu’udar juventude ne’ebé hamahan aan iha Grupu Aventura ne’e hakarak hola parte iha eventu istóriku ne’e.

“Ami Grupu aventura kompostu husi estudante 39, feto 11 no mane 27 ne’e la’o ain hahú iha loron 13  husi Ainaru no ramata iha Dili kuartel F-FDTL iha loron 20”, tenik Koordenadór Martinho da Costa ba TATOLI iha Komemorasaun Aniversáriu FALINTIL ba dala 44 iha Kuartel Jerál F-FDTL, Fatuhada, tersa (20/09/2019).

Koordenadór ne’e katak durante loron  hitu la’o tuir dalan sira hasoru obstaklu, tanba membru barak foun entaun barak sente kolen no ain moras maibé fó korajen ba malu, la’o ain ne’e konsege termina tuir data komemorasaun.

Nune’e mós koordenadór Interino ESHANA, Jacob de Deus Tavares, haktuir sira-nia viajen hahú husi Vikeke ho membru 50 kompostu feto 20 mane 30.

“Durante la’o ne’e iha obstaklu mak sira hasoru tanba kolega balun hetan naksalak maibé sempre fó nafatin motivasaun ba malu buat hotu la’o di’ak”.

Durante jornada lao ain semana ida ne’e, ESHANA iha liña koordenasaun ho universidade tanba maioria mesak estudante UNTL. Tanba ne’e difikuldade ne’ebé sira hasoru la iha impaktu ba atividade ne’e.

Portantu fatin termina ikus iha Kuartel Jerál Fatuhada sai duni realidade. “Ami bele asiste komemorasaun aniversáriu FALINTIL nian ba dala 44 iha 20 agostu ho susesu”.

Entertantu, jornada ida ne’e kada tinan sempre hala’o tan ne’e la´ós buat foun ida. Partisipante eventu ne’e kuaze membru hamutuk 89 kompostu husi grupu rua ne’ebe fahe ba zona leste no oeste no ikus taka iha Dili.

Notísia relevante:ESHANA La’o Ain Presta Omenajen ba FALINTIL

Jornalista :Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here