Ministru Obra Públika, Salvador Soares dos Reis Pires, Imajen/Florencio.

DILI, 19 agostu 2019 (TATOLI)-Ministru Obra Públika (MOP), Salvador Eugénio Soares dos Reis Pires, informa daudaun ne’e, kompañia WARTSILA maka  hala’o manutensaun ba  sentrál elétrika iha Hera no Betanu.

“Sentrál elétrika Hera no Betanu  halo manutensaun husi kompañia WARTSILA ne’ebé iha kualifikadu duni no esperiénsia barak iha indústria tanba mákina sira mak prodús” Ministru Salvadór ba Ajénsia Tatoli, iha Edifísiu MOP, Mandarin, ohin.

Ministru  haktuir horikalan ahi mate durante oras haat nia laran, hahú husi tuku 19:50 too 23:20 iha territóriu Timór laran tanba problema sirkuitu iha breaker protesaun ba trasformadór  mak mate iha sentrál elétrika Hera.

“Ita haree kuandu sirkúitu  breaker mate, jeradór sira bele funsiona maibé labele passa ahi ka enerjia mai iha liña transmisaun”, katak.

Tuir  ministru katak sentrál elétrika Betanu labele ajuda sentrál elétrika Hera tanba derrepente nia loading muda ba sentrál elétrika Betanu, entaun nia suite la foti tanba ne’e presiza halo mudansa neneik hodi  labele estraga.

“Ita haree horikalan la konsege uza Betanu atu fornese tanba nia problema iha  sistema kuandu muda derrepente ba sentrál elétrika, nia sistema produsaun (suite) la foti, ne’ebé halo mudansa tenke planeadu”, haktuir tan.

“Ekipa téknika EDTL no Kompañia WARTSILA sira esforsu hela atu halo manutensaun hodi situasaun ne’e labele akontese tan iha futuru”, salienta.

Ministru agradese ba pasiénsia povu tomak iha territóriu Timór laran tomak ne’ebé durante oras haat la konsege asesu ba enerjia elétrika tanba sirkúitu iha breaker protesaun  ba transformadór sentrál elétrika Hera.

Entretantu, kustu orsamentu ba manutensaun sentrál elétrika hamutuk millaun $10 kada tinan.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here