Parada hosi membru F-FDTL bainhira komemora loron FALINTIL ba dala-43 (20 agostu 1975-20 agostu 2018) iha Kuartél Jenerál Fatuhada, Dili. Imajen/ António Goncalves

DILI, 19 agostu 2019 (TATOLI)-Povu Timor-Leste, tersa aban (20/08/2019), selebra loron istóriku FALINTIL ba dala-44 (20 agostu 1975-20 agostu 2019).

Molok to’o serimónia ba festa FALINTIL nian ne’e, ohin, hahú uluk ho misa agradesimentu iha Igreja Motaél, Dili, hodi hasa’e orasaun ba eroi FALINTIL sira ne’ebé dedika sira nia  vida tomak hodi nakfilak rai ida ne’e sai independénsia.

Selebrasaun misa agradesimentu ne’ebé partisipa husi família boot FALINTIL-Forsa Defeza Timor-Leste (F-FDTL, sigla portugés) ne’e prezide husi Padre Domingos Alves.

Iha nia omilia, Padre Domingos Alves, hateten, bainhira hateke ba tinan 44 ba kotuk, timoroan barak mak mate no terus. Barak nia run no ran naklekar lemo-lemo iha rai timor laran  tanba defende prinsípiu no integridade ukun rasik aan.

“Ita tenke hateke ba  kotuk, ba ita-nia eroi sira-nia ruin no ran ne’ebé mak fakar, no sira-nia kontribuisaun mak ita bele liberta no deside ita-nia ukun rasik aan ida ne’e,” afirma Padre Domingos Alves.

Nia afirma tan, maske tempu luta forsa FALINTIL uitoan de’it, kompara ho forsa nasaun Indonéziu nian, maibé ho sira nia matenek natureza, sira nia prontidaun, sira nia fiar no sira nia determinasaun, ikus mai lori rezultadu ida ohin loron Timoroan tomak moris iha liberdade no integridade hanesan nasaun no hanesan Estadu.

“Ba FALINTIL sira nia dedikasaun. Merese ba ita atu hasa’e agradesimentu no hakru’uk ba sira,” hateten Padre Domingos Alves.

Jornalista : Osória A. Marques

Editór       : Francisco Simões

HAKEREK NO HATÁN

Please enter your comment!
Please enter your name here