Profesór Eskola Bázika Filiál (EBF)-Halic, Adão de Jesus, foto ho nia estudante sira hamirk iha eskola oin ne'ebé at ona. Imajen/Eugénio Pereira

COVALIMA, 19 agostu 2019 (TATOLI)-Komunidade Aldeia Halic, Suku Beco, Postu Administrativu Suai, Munisípiu Covalima,  husu ba Governu liuhusi Ministériu Edukasaun (ME) atu hadi’a hikas kondisaun Eskola Bázika Filiál (EBF) no Eskola Bázika Central (EBC), Halik  ne’ebé kondisaun infraestrutura komesa aat ona.

Profesór Adão de Jesus

Eskola ne’e ho totál sala aula tolu, no sala administrasaun ida ho totál alunu 52 no profesór nain haat (4) kompostu husi permanente ida no kontratadu na’in tolu.

Eskola EBF ne’e rasik Governu Timor-Leste harii husi Projetu Pakote Referendum (PPR) iha tinan 2009 liubá ho kondisaun uma ho bebak liu ona tinan 10 kondisaun fíziku ai no kalén komesa aat  hotu ona.

Profesór Eskola Bázika Filiál (EBF) Halik, Adão de Jesus dehan, sira preokupa kondisaun fíziku uma ne’e komesa aat ona, inklui sala aula la sufisiente atu akumula númeru estudante ne’ebé kada tinan sempre aumenta.

“Ami nia kondisaun eskola ne’e agora komesa aat ona, tanba ne’e ha’u husu Ministériu Edukasaun atu hadi’a hikas, tanba too tempu udan bee tama estudante sira tuur de’it iha bee leten,” dehan Profesór Adão ba jornalista sira, ohin, iha Aldeia Halik-Covalima.

Nia dehan, iha tempu rai udan, bee tama eskola no alunu sira tuir prosesu aprendizajen arraska no dala ruma tempu rai udan mota tun boot alunu sira labele ba eskola.

Problema seluk tan maka, númeru professor na’in haat la sufisiente atu hanorin estudante sira no husu ba oin Governu atu aumenta númeru profesór inklui apoiu livru no hadi’a biblioteka ba estudante sira.

Iha tinan 2018, sira hato’o ona proposta ba Ministériu Edukasaun Rejiaun Covalima hodi aprezenta ba Ministériu Edukasaun sentrál atu hadi’a eskola ne’e, maibé too agora sira rasik seidauk rona resposta klaru.

Nia hatutan, iha tempu Indonézia iha tinan 1996 bainhira Governu Indonézia ukun harii tiha ona eskola ida ho sala tolu inklui sanitaria kompletu, maibé kondisaun uma agora aat ona presiza halo reabilitasaun foun fila fali.

Iha fatin hanesan, eis Xefe Aldeia Halik, Alberto da Jesus   husu atu governu hadi’a eskola ne’e, tanba labarik barak dala ruma atu ba husi Aldeia Halik ba Suku Beco dala ruma la’o distánsia kilómetru lima (5) dook liu.

Totál abitante iha Aldeia Halik 256 ho uma kain 42 durante ne’e enfrenta mós problema susar asesu ba estrada, no eletrisidade no problema sosiál seluk tan.

Jornalista             : Eugénio Pereira

Editór                  : Francisco Simões

HAKEREK NO HATÁN

Please enter your comment!
Please enter your name here