Ministru Obra Públika (MOP), Salvador Eugenio Soares dos Reis Pires, enkontru ho kargu xefia MOP prepara planu ba OJE 2020. Imajen/Tatoli.

DILI, 19 agostu 2019 (TATOLI)-Ministru Obra Públika (MOP), Salvador Eugénio Soares dos Reis Pires, halo enkontru ezersísiu tékniku ho kargu xefia no ajénsia dezenvolvimentu sira hodi halo planu bazeia ba prioridade hanesan bee, estrada no eletrisidade iha 2020.

MOP, Salvador Eugénio Soares dos Reis Pires, informa  hahú diskute planu orsamentu 2020 nian atu haree ba komponente projetu sira ne’ebé balun tama ona dezeñu no konkursu públiku ba trosu estrada sira, bee no eletrisidade atu implementa iha tinan oin.

“Ami Espera iha dezembru (2019) ka janeiru (2020) iha ona kustu estimativa ne’ebé lori ba konstrusaun fíziku ba planu prioridade hirak ne’e”, Ministru Salvador afirma ba Ajénsia Tatoli hafoin enkontru iha Mandarin, ohin.

Vizaun Oitavu Governu Konstitusionál mak atu hametin konetividade ba territóriu Timor-Leste tomak atu hasa’e benefísiu sósiu-ekonómiku ba populasaun tomak.

“Ne’ebé estrada no bee importante, hanesan Primeiru-Ministru Taur Matan Ruak orienta katak 2020 tenke fó prioridade ba bee”, relata.

Tanba ne’e nia dehan, MOP orienta ba kargu xefia no ajénsia dezenvolvimentu sira atu haree no planu orsamentu sira ne’e bazeia ba orientasaun Primeiru-Ministru iha Jornada Orsamentál 2020 nian.

“Ha’u hala’o ona ezersísiu tékniku ho ajénsia dezenvolvimentu sira atu akresenta  orientasaun Primeiru-Ministru nian liuhusi planu Orsamentu Jerál Estadu (OJE) 2020 nian fó prioridade hanesan bee, estrada no liña eletrisidade”, katak.

Hodi salienta MOP nia pakote orsamentál 2020 hamutuk millaun U$58-resin.

“Ba orsamentu kombustivel sentrál elétrika rua ne’e tama ba orsamentu Todu Governu, la tama ona ba orsamentu MOP nian”, Salvador afirma.

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here