Prezidente Tribunál Rekursu, Deolindo dos Santos. Imajen/Egas Cristovão

DILI, 16 agostu 2019 (TATOLI) Prezidente Tribunál Rekursu (PTR), Deolindo dos Santos, hateten nia parte sei estuda pedidu fiskalizasaun preventiva husi Prezidente Repúblika, Francisco Guterres Lú Olo, kona ba alterasaun lei atividade petrolífera no fundu petrolíferu.

Notísia Relevante : PR Veta Proposta Alterasaun Lei Atividade Petrolífera Ho Razaun Lima

“Prazu normál tuir konstituisaun loron 25 ba Tribunál atu pronúnsia, no Prezidente Repúblika husu ba loron 20 ba pedidu rua ne’e, tanba pedidu rua ne’e tama iha loron hanesan, ho razaun ne’e ninia prazu hanesan de’it”, informa Deolindo dos Santos ba jornalista sira iha Tribunál Rekursu (TR), Kaikoli, ohin.

Hatán kona ba desizaun Prezidente Repúblika veta polítika ka jurídika, Deolindo dos Santos, lia tun dehan Prezidente Repúblika husu ba Tribunál Rekursu no sei haree depois pronúnsia mak Prezidente Repúblika foti ninia pozisaun kona-ba diploma sira ne’e.

Iha konstituisaun artigu 149 ko’alia kona ba fiskalizasaun preventivu dalan lei inan nian ne’ebé deskreve iha alínea 1, Prezidente-Repúblika bele husu ba Tribunál Supremu Justisa nian atu halo apresiasaun preventivu kona-ba konstitusionalidade ba naran diploma ida-ne’ebé nia simu atu halo promulgasaun.

Alínea 2 kona ba apresiasaun preventivu ba konstitusionalidade bele husu iha prazu loron 20 nia laran, sura hosi loron ne’ebé simu diploma, maibé Tribunál Supremu Justisa nian tenke fó-sai iha prazu loron ruanulu resin lima, ne’ebé Prezidente-Repúblika bele habadak tanba urjénsia.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here