Prezidente Repúblika, Francisco Guterres Lú Olo, entrega livru istória Prezidente Nicolau Lobato ba Xefe Estadu Maiór-Jenerál Forsa Armada Portugal, Almirante António Silva, durante hasoru malu iha Palásiu Prezidente Nicolau Lobato, ohin. Imajen Mídia PR

DILI, 16 Agostu 2019 (TATOLI)—Forsa Armada hosi Portugal prontu nafatin atu fó apoiu ba dezenvolvimentu instituisaun FALINTIL-Forsa Defeza Timor-Leste (F-FDTL).

Prontidaun ne’e relata hosi Xefe Estadu Maiór-Jenerál Forsa  Armada Portugal, Almirante António Silva, durante hasoru malu ho Prezidente Repúblika, Francisco Guterres Lú Olo iha Palásiu Prezidente Nicolau Lobato, Dili, ohin.

Dutante soru-mutu, Almirante Silva Ribeiro, relata ba Xefe Estadu kona-ba kooperasaun entre Forsa Armada Portugal no Timor–Leste liliu formasaun ba ofisiál superiór F-FDTL no PNTL, hadi’a monumentu omenájen ba militár portugés no timoroan sira ne’ebé mate iha funu-japonéz, tinan-1942, iha Aileu vila.

Amirante mós ko’alia kona-ba dezenvolvimentu Komponente Navál no importánsia Autoridade Marítima iha Timor-Leste hodi proteje no organiza oinsá aproveita poténsia área marítima ne’ebé bele fó benefísiu ba Timor-Leste.

“Forsa Armada Portugal prontu koopera no apoiu nafatin dezenvolvimentu Forsa Armada F-FDTL”, tenik Almirante.

Kona-ba prontidaun ne’e, Prezidente Repúblika, Francisco Guterres Lú Olo agradese no deklara katak importante kooperasaun sira ne’ebé Forsa Armada rua halo bele enkuandra iha planu dezenvolvimentu Timor-Leste nian.

Xefe Estadu Lú Olo iha esperansa boot katak, ho kooperasaun ne’e, bele hametin liu-tan relasaun entre nasaun rua.

Prezidente Repúblika rekoñese katak dezenvolvimentu área marítima importante no sei la haluha atu kontinua nafatin dezenvolve área terreste ne’ebé timoroan barak hela ba.

Nia subliña, importante liu mak oinsá benefísiu sira ne’ebé hetan hosi área marítima timoroan sira hotu bele sente.

Durante estadia iha Timor-Leste, Almirante Silva Ribeiro sei  partisipa iha serimónia Komemorasaun Loron-FALINTIL, 20 agostu.

Almirante Silva mós fó formasaun ba ofisiál superiór F-FDTL no PNTL ne’ebé realiza hosi Institutu Defeza Timor-Leste.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here