Husik karuk ba loos, Gil da Costa Monteiro ‘"OAN SORO", Pasqual Ximenes Pereira ‘"NICSON", Kay Rala XANANA Gusmão, Saudozu Jaime Ribeiro ‘"SAMBA SEMBILAN’ (9)" no ‘MAUCANA’ hasai foto hamutuk, hafoin partisipa serimonia dezmobilizasaun FALINTIL iha 2012. Imajen/Eugénio Pereira

DILI, 15 agostu 2019 (TATOLI)-Atu komemora aniversáriu FALINTIL ba dala-44 (20 agostu 1975-20 agostu 2019), ohin, komisaun organizadora mobiliza asaun karidade ba ema moras sira iha Ospitál Nasionál Guido Valadares (HNGV-sigla portugés).

Segundu Vise Komisaun Organizadora hosi FALINTIL-Forsa Defeza Timor-Leste (F-FDTL),  Majór, João Bosco Ximenes, iha konferénsia imprensa esklarese katak, alein asaun karidade, iha loron 19 agostu, tuku 9:00 Otl, komisaun organiza selebra mós misa agradesimentu  ne’ebé maka sei hala’o iha Igreja Motaél.

Iha loron hanesan komisaun ho konvidadu sira kontinua dezloka ba Jardim Eroi Metinaro hodi kari ai-funan nu’udar símbolu  omenajen ba Eroi ne’ebé oferese sira ninia vida ba libertasaun nasionál.

Iha loron tuir mai, 20 agostu, sei hala’o mós parada militár hosi F-FDTL iha Kuartél Jenerál, Fatuhada, Dili.

 “Komisaun organizadora hakarak konvida povu tomak iha territóriu laran atu mai partisipa serimónia komemorasaun loron importante ne’e,” apela Majór, João Bosco Ximenes.

Nia  dehan, komemorasaun ne’e,  konsentra de’it iha  nasionál,  tanba ne’e,  komisaun organizadora husu ba lider komunitáriu no autoridade lokál iha Munisípiu Dili  hodi organiza povu  atu partisipa mós iha eventu istóriku ne’e.

Prezidente  Repúblika, Francisco Guterres  Lu Olo,  maka sei prezide serimónia ne’e no partisipa mós hosi  Primeiru Ministru, Taur Matan Ruak, membru Governu, Parlamentu Nasionál no konvidadu seluk tan.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here