Vice Prezidente Asuntu Gabinete Formasaun Professional, Arlindo Pinto. Imajen/TATOLI

DILI, 15 agostu 2019 (TATOLI)–Vise Prezidente Gabinete Formasaun Profesionál Kontinua, ohin, hateten Institutu Nasionál Formasaun Dosente no Profesionál Edukasaun (INFORDEPE) nu’udar oragun otonómu ida ne’ebé tutela iha Ministériu Edukasaun, Juventude no Desportu nia mahon atu reforsa atividade fó formasaun no halo transformasaun abilidade ba profesór sira hotu iha territóriu Timor-Leste laran tomak.

“INFORDEPE prontu atu garante kualidade hodi halo tranformasaun abilidade ba profesór sira ho adekuadu atu nune’e bele garante futuru ida di’ak ba Timor-Leste. Tanba ne’e INFOPRDEPE iha ninia gabinete tolu mak toma responsalblidade atu trata kondisaun profesór sira nian nível akadémiku,” dehan Vise-Prezidenti Gabinete Formasaun Profesionál, Arlindo Pinto ba Ajénsia TATOLI liuhusi entrevista iha ninia gabinete, Balide, Dili, kinta (15/8/2019) .

Vise-Prezidenti ne’e esplika katak Gabineti Formasaun Akademia (GFA) ninia responsalblidade atu haree liu ba profesór sira ne’ebé naun atividade, atu nune’e bele loke formasaun ba sira hodi bele hetan kursu lisensiadu, baxarealtu no pos-gradua.

Tuir nia, serbisu ida ne’e rasik INFORDEPE halo ona liuhusi kooperasaun di’ak ho Ensinu Superiór Universidade Nasionál Timor Lorosa´e (UNTL) atu fó espasu ba profesór sira hodi kontinua sira ninia pos-gradua.

Aleinde ne’e, iha mós Gabinete Formasaun Profisionál Kontinua (GFPK) ne’eb’e haree liu ba profesór sira iha nivel Ensinu Pre-Eskolár, Ensinu Báziku no Ensinu Sekundáriu inklu Ensinu Tékniku Vokasionál.

“Ita hatene katak formasaun ida ne’e foka liu ba formasaun Kontinua, formasaun vokasionál no formasaun konsolidasaun ba língua Portugeza,” nia tenik.

Entretantu, iha mós Gabinete Peskija Dezenvolvimentu Monitorizasaun no Avaliasaun (GPDMA) ne’ebé mai ho ninia papel atu halo monitorizasaun, foti dadus, no halo analiza ba dadus sira.

Agora Gabineti Formasaun Akademia (GFA) ne’e rasik, durante ne’e fó ona formasaun ba profesór rézime kontratu iha 2015 no ba sira ne’ebé baxarelatu no oras ne’e la’o hela iha munisípiu 12 no profesór sira ne’e hotu hamutuk 2.946 pesoa.

“Sira ne’e kuandu remata ona formasaun, Ministeriu Edukasaun Juventude no Desportu (MEJD) hamutuk ho Komisaun Funsaun Publiku (KFP) sei halo fali avaliasaun ba sira-nia réjime kontratu ne’e,” nia esplika.

Nia informa, Gabinete Formasaun Profesionál Kontinua (GFPK) iha tinan ida ne’e fó ona formasaun ba profesór sira nível Ensinu Pre-Eskolar hodi foka liu ba konteudu kurikular, ne’ebé fahe ba atividade sala de aulas, jestaun de clase, literasia no numerasia. Profesór sira husi nivel Pre-Eskolár ne’ebé partisipa iha formasaun ne’e hamutuk 673 ne’ebé kobre Postu Administrativu hotu iha territóriu TL.

Jornalista : Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here