Prezidente FATL, Afrânio Xavier Amaral

DILI, 15 agostu 2019 (TATOLI)—Federasaun Atletizmu Timor-Leste (FATL), ohin, iha salaun Konfederasaun Desportiva Timor-Leste (CDTL-sigla Portugés), Caicoli, realiza asembleia jerál ba dala lima.

Iha asembleia jerál ne’e, partisipa hosi asosiasaun FATL munisípiu sanulu resin tolu hodi halo eleisaun ba estrutura FATL. Iha eleisaun, asosiasaun hirak ne’e fó votu a-favór ba Afrânio Xavier Amaral hodi kontinua lidera FATL ba tinan lima.

Tanba eleitu dala-ida tan ba prezidente FATL,  ba jornalista sira, Afrânio hateten nia liu tanba kandidatu hosi asosiasaun sira no nia prontu nafatin lidera FATL.

“Sira mak kandidatu ha’u. Ha’u liu ona entaun ha’u prontu nafatin hodi hala’o serbisu. Buat barak mak ita seidauk halo ba nasaun ida ne’e,” dehan Afrânio.

Nia hatutan, mandatu ne’ebé nia simu la’ós buat ne’ebé fásil maibé tanba nasaun no povu nia kontinua simu ho liman rua maski lidera ona durante tinan barak nia laran

Entretantu, estrutura foun mak hanesan Afrânio Xavier Amaral (Prezidente), Elias de Deus (Vise Prezidente), Filomena Barros (Sekretária Jerál) no Erna Amaral (Tezoreira).

Durante FATL harii iha Timor-Leste, Afrânio mak lidera federasaun refere to’o ohin loron tanba hetan fiar hosi asosiasaun sanulu resin tolu.

Aleinde ne’e, Afrânio mós agora hanesan Prezidente Konfederasaun Desportiva Timor-Leste ne’ebé eleitu iha 2016 liu-ba.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here