Ofisiais PNTL wainhira partisipa iha seremonia komemorasaun loron restaurasaun independensia, 20 Maiu 2019, iha Palásiu Prezidente Bairru-Pite, Dili. Imajen/Antonio Goncalves

DILI, 14 agostu 2019 (TATOLI)-Komandu Polisia Nasionál Timor-Leste(PNTL) Munisípiu Covalima, foin lalais ne’e, kaptura no detein ema na’in  13 tanba envolve iha prátika “kontra bandu” no atividade ilegál.

  “Ba suspeitu hirak ne’e ita detein no agora nia prosesu haruka hotu ona ba Ministériu Públiku,” informa Komandante Munisípiu Covalima, Superintendente Xefe Antonio Maria de Sa, ohin, ba Jornalista sira iha Kuartél Jerál PNTL, Caicoli, Dili.

Operasaun PNTL Munisípiu Covalima nian haktuir ba implementasaun  dekretu lei númeru 5/2017 kona-ba lei arma branka no grupu arte marsiaís no mós  garante estabilidade iha ámbitu preparasaun ba komemorasaun  tinan 20 loron konsulta popular (30 agostu 1999- 30 Agostu 2019) no mós prezensa forsa INTERFET,  20 setembru 1999.

Komandu PNTL Munisípiu Covalima hahú hala’o operasaun ne’e iha loron 01 agostu, hodi prende mós sasán ilegál hanesan sigarru no motor ne’ebé tama ilegál iha área fronteira terrestre.

“Komandu PNTL Covalima koopera ho unidade seguransa iha fronteira (Unidade Patrullamentu Fronteira-UPF) konsege prende  sasán ilegál balun hanesan sigarru ho motor,” informa Antonio Maria de Sa.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here