Vise Ministru ba Dezenvolvimentu Estratéjiku Saúde, atuál Ministru Saúde Interinu, Bonifácio Maucoli dos Reis. Imajen: TATOLI

DILI, 14 agostu 2019 (TATOLI)—Vise Ministru Ba Dezenvolvimentu Estratéjiku Saúde, atuál Ministru Saúde Interinu, Bonifácio Maikoli dos Reis, hasoru malu ho Primeiru-Ministru, Taur Matan Ruak, hodi informa kona-ba Ministériu Saúde loke konkursu atu moderniza Hospital Nacional Guido Valadares (HNGV).

“Ohin ami mai informa ba Primeiru-Ministru katak prosesu la’o ona no loke ona konkursu ba kompañia sira ne’ebé mak iha espesialidade ba dezeñu no BOQ (Bill  of Quantity) hodi halo planu ba planu mestri HNGV nian”, dehan Maikoli, iha Palásiu Governu, kuarta ne’e.

Nia hateten, kalkulasaun orsamentu planu mestri HNGV nian depende ba kompañia ida ne’ebé mak iha planu ho kustu balansu.

Maucoli informa, konkursu ne’e loke ba públiku, katak kompañia nasionál no internasionál mós bele kompete. “Ospitál ne’e nia modelu hanesan ospitál universitáriu ne’ebé mak bele atende tratamentu, maibé loke mós ba ita-nia estudante sira bele apriende iha ne’ebá”, nia esplika.

Vise Ministru Saúde ne’e haktuir katak Primeiru-Ministru, Taur Matan Ruak, apresia katak prosesu konkursu ne’e tenke la’o duni tanba nu’udar nasaun independente tenke iha ospitál di’ak ida.

“Ita tenke harii ona kapasidade ospitál para bele responde nesesidade komunidade no redúz ona evakuasaun moras ba rai-li’ur. Ita sei kompleta ho ekipamentu médiku, liliu haree ba espesializasaun ba rekursu umanu oinsá atu hasa’e kapasidade médiku no infermeiru sira hodi fó serbisu di’ak ba komunidade”, katak nia.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here