Ministru Obra Públika, Salvador Soares dos Reis Pires. Imajen: TATOLI

DILI, 14 agostu 2019 (TATOLI)—Ministru Obra Públika, Salvador Soares dos Reis Pires, aprezenta ona setór enérjia kona-ba estudu interkonesaun rejionál hosi sistema elétriku entre Timor-Leste ho Indonézia.

Kuarta ne’e iha Palásiu Governu, Konsellu Ministru (KM) asiste no rona aprezentasaun hosi Ministériu Obra Públika (MOP) Ministru Salvador no espesialista hosi Banku Mundiál ba asuntu refere.

Ministru Estadu Prezidénsia Konsellu Ministru, Agio Pereira, dehan estudu refere aprezenta mós rekomendasaun atu troka fonte enerjétika ne’ebé utiliza iha sentrál elétrika.

“Muda gazóleu ba óleu kombustível pezadu ka ba Gás Naturál Likuifeitu (GNL), ida ne’ebé mak bele halo redusaun ba kustu hosi %30”, dehan Agio Pereira liuhosi Konferénsia ba Imprensa.

Nia subliña, aleinde GNL, bele halo redusaun ba kustu no mós hanesan fonte enerjétika ida ne’ebé menus polusaun no efisiente liu.

“Estudu ida ne’e aprezenta vantajen balun hosi interkonesaun rejionál hosi sistema elétrika. Posibilidade hosi Timor-Leste komersializa eletrisidade ho Indonézia, hodi esporta sira-nia excedente ba Timor Osidentál ne’ebé iha kapasidade insufisiente”, Agio esplika.

Tanba ne’e, Konsellu Ministru fó plenu podér ba Ministru Obra Públika, Salvador Soares dos Reis Pires, atu realiza estudu viabilidade ba projetu no atu hahú negosiasaun ho entidade relevante sira hosi Governu Indonézia ba interkonesaun rejionál ne’e.

Entretantu, loloos ne’e, ohin, KM hala’o diskusaun ba Dekretu-Lei Primeira Alterasaun Dekretu-Lei númeru 9/2017, 29 de marsu, kona-ba Estatutu Orgánika Autoridade Aduaneiru no Primeira Alterasaun Dekretu-Lei númerú 13/2017, 5 abríl, kona-ba Estatutu Autoridade Tributária hosi Ministériu Finansa, maibé la konsege no adi’a fali ba semana oin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here