Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur. Imajen/TATOLI.

DILI, 14 agostu 2019 (TATOLI)-Xefe Estadu Maiór Forsa Defeza Timor-Leste (F-FDTL) Majór Jenerál Lere Anan Timur husu ba líder nasionál atu konsensu hodi tuur hamutuk atu jere no diskute risku no benefísiu dada kadoras mai Timor-Leste.

“Presiza ita-nia maun-boot sira (líder nasionál) tenke tuur hamutuk atu diskute risku sira hodi oinsá dada mina (kadoras) mai Timor-Leste atubele dudu dezenvolvimentu nasionál”, Majór Lere afirma iha ámbitu Autoridade Nasionál Petróleu no Minerál aprezenta Fronteira Marítima ba ofisiál F-FDTL sira iha Kuartél Jerál F-FDTL, ohin.

Tanba ne’e, Lere Anan Timur lori F-FDTL nia naran husu maun-boot Xanana Gusmão atu halo konsensu hodi dada kadoras mai Timor-Leste. Tanba agora, ko’alia ekonomia no negósiu, enkuantu negósiu ne’e ema hakarak manán, lakon ne’e laiha.

“Dada kadoras mai Timor-Leste ne’e sempre iha risku, ne’ebé presiza tuur hamutuk hodi diskute atu ultrapasa husi risku ne’e atu aban-bainrua labele fó sala ba ema ida de’it”, Majór Jenerál Lere sujere.

Majór Jenerál Lere konfia nafatin ba maun-boot Xanana Gusmão ne’ebé lidera negosiasaun fronteira marítima ne’e.  “Tanba uluk luta ba ukun rasik aan mós ema balun la fiar, maibé ita ukun aan ona no fronteira marítima mós ema barak la fiar, mas agora fronteira marítima ita iha ona”, Lere subliña.

Xefe Estadu Maiór ne’e hatutan atu lori kadoras mai ne’e risku sempre iha, maibé nu’udar líder tenke brani foti desizaun.

Ho nune’e, líder rezisténsia luta ba libertasaun nasionál ne’e ho esperansa boot atu iha loron  30 agostu tinan ne’e, Estadu Timor-Leste ho Estadu Austrália bele realiza duni troka nota entendimentu atubele hatudu imajen ba mundu katak líder nasaun ne’e sólidu atu lori país bá oin.

Antes ne’e, Xefe Negosiadór Prinsipál ba asuntu Fronteira Marítima, Xanana Gusmão, sente  kontente tanba Timor-Leste konsege diskute nia fronteira marítima ho nasaun ne’ebé dezenvolvidu tebes.

“Ha’u kontente tanba ita hetan fronteira ida ho país ida ne’ebé to’os tebetebes, antes ita ukun aan iha 1999, sira (Austrália) asina ona kontratu ho Indonézia hodi foti ita-nia rikusoin ne’ebé pasadu sira ne’e hatudu mai ita katak presiza halo negosiasaun ho esforsu maka’as”, katak.

Tanba ne’e, Xanana Gusmão husu ba públiku atu lalika duvida ona tanba kadoras (pipeline) sei dada mai iha Timor-Leste.

“Ha’u sente kontente tanba apezarde 20 anos de’it mós ita halo buat balun, rai barak ukun aan kleur ona ha’u vizita sira aat liu ita, ne’ebé ita sente katak di’ak no ita kontinua la’o neineik ho esforsu maka’as ho vontade atu serbí labele lakon”, Xefe Negosiadór afirma.

Jornalista: Florencio Miranda Ximenes

Editora : Maria Auxiliadora 

1 KOMENTÁRIU

HAKEREK NO HATÁN

Please enter your comment!
Please enter your name here