Komunidade Aileu kari ai-funan iha Jardin Herois Nicolau Lobato ho hanoin hikas 30 agostu 1999

AILEU, 13 agostu 2019 (TATOLI)-Selebrasaun Loron Konsulta Populár ba dala-20 (30 agostu 1999-30 agostu 2019) ho prezensa forsa INTERFET (International Forces for East Timor) iha Timor-Leste, 20 setembru 1999, hanesan fó hanoin ba jerasaun foun liuliu ba juventude sira, atu hatene kona-ba lala’ok luta ba ukun rasik aan ida ne’e.

José Valente Borges da Costa, nudar Xefi Juventude ida iha Municipio Aileu.Imajen/Nelia Fernandes

José Valente Borges da Costa, nu’udar Juventude haktuir katak, iha tinan 20 liubá hafoin akudesan, ahi suar fanu Munisípiu Aileu, haree iha tempu ne’ebá ho difisil tebes.

“Iha tempu ne’ebá ha’u tinan 16, ha’u haree estragu barak iha Timor, liuliu Munisipiu Aileu, dalan-dalan sira asu tanis, nune’e mós asu tanis iha kalan depois na’in la iha, depois ha’u komesa hateke ema sona malu, depois sira oho, ha’u haree tempu hanesan nakukun tebes ba iha Timor,” haktuir Juventude José Valente Borges da Costa kona-ba situasaun kruel iha Aileu tinan 20 liubá,” iha Suku Aisirimou, Postu Aileu-Vila hafoin ramata kari ai-funan iha Jardin Herois Nicolau Lobato, segunda (13/08/2019).

Ho neon sira, nia haktuir, iha momentu ne’ebá sente difisil tebes, oinsá mak Timor ne’e bele hasai aan ka kore aan husi invazór sira. “Ne’ebé agora daudauk ha’u sente haksolok Timor hetan ona liberdade, hetan ona dezenvolvimentu la’o ba oin, eskola sira ita haree infrastrutura sira, ita-nia prosesu dezenvolvimentu sira, la’o neineik ba oin, ne’ebé ita haree buat hotu komesa di’ak ho ekonomia sira ne’e”.

Ho ukun aan ida ne’e, nia hateten, nu’udar joven ne’ebé asiste direta situasaun kruél iha pasadu, sujere jerasaun foun sira agora atu aprende no estuda maka’as. “Ha’u-nia esperansa ba jerasaun foun sira, tenke aprende di’ak liután, estuda maka’as hodi dezenvolve ita-nia rai ne’e ba oin ho futuru ne’ebé nabilan, tuir ita hothotu nia hakarak,” espera juventude José Valente Borges da Costa.

Iha fatin hanesan, Marcelino Mendonça nu’udar Veteranu haktuir katak, bainhira atu tama ba  iha loron Konsulta Populár, nia nu’udar mós katekista aproveita atu konvense sarani kona-ba ukun rasik aan, ho kaer mós boletin kona-ba pro-autonomia no referendum nian.

Marcelino Mendonça, nu’udar Veteranu ida husi Municipio Aileu, Imajen/Nelia Fernandes

“Kalan-kalan ha’u iha momentu ne’ebá sai mós hanesan ema katekista, tenke lori ida ne’e sai ba kontrola mós sarani sira para ba atu konvense, hodi esplika katak oinsá ita ukun rasik aan ita halo hanesan ne’e no ne’ebá, karik ema ida ne’e mak sei ukun ita bele halo ita sei halo hanesan ne’e no ne’ebá mós,” nia haktuir.

Veteranu ne’e mós haktuir, depois 3o agostu hotu anunsia katak referendum mak sira mós hasees aan husi vila. “Iha momentu ne’ebá ami halai sa’e kedas ba foho, inklui ha’u, dia 31 ha’u sei iha uma rasik, dia 1 ou 2 ha’u iha ona foho, to’o malae tuun”.

“Ha’u-nia hanoin agora la hanesan uluk ona, agora povu moris di’ak no moris livre, povu ida ne’ebé moris iha mota ku’ak, hela iha foho tutun, bee mós tuir, ahi mós tuir ba,” nia rekoñese.

Iha biban ne’e, perante jornalista sira nia espera: “Ha’u-nia esperansa ba futuru, karik, aban bainrua ami katuas sira ne’e bele mate tiha ou Maromak bolu ida por ida, jerasaun foun tenke la’o tuir ami-nia ain fatin, ne’ebé, la’o ona ne’e, atu Timor bele la’o ba oin”.

Enkuantu, vítima ida husi asaun pro-autonomia sira, Josefa da Silva Garsia haktuir katak sira halai ba ai-laran maibé depois deside fila fali mai tanba nia katuas moras.

“Depois ami to’o ba iha ponte Aisirimou nian ne’e, ema dehan agora ita simu iha rua: ida Timor atu ukun aan, ida kona-ba autonomia, depois ami fila ba iha uma to’o iha Manefoni, katuas oan matebian mós seidauk mate,” hateten Josefa da Silva Garsia, ba jornalista sira iha Semitériu Públiku Malere, hafoin ramata kari ai-funan ba matebian eroi sira.

“Depois ami to’o iha uma, katuas-oan dehan hanesan ne’e di’ak liu ha’u ho labarik sira hela de’it iha uma, imi mak halai sa’e ba ai-laran. “Ami hatán hanesan ne’e, karik ami halai sa’e ba ai-laran ami mak moris, katuas mate, ne’ebé ami hateten di’ak liu ita hothotu halai sa’e ba ai-laran hotu,” konta tan Josefa da Silva.

Nia hateten, iha 30 agostu, iha votasaun mak ohin loron ita ukun rasik aan. “Katuas mate ne’e mós tanba la’ós buat seluk maibé tanba ukun aan”.

“Ami ba vota tiha ne’ebá iha eskola fatin, fila fali mai katuas dehan ohin ita sempre ukun aan duni, ne’ebé iha segunda katuas mate ne’e iha dia 6 de setembru, ne’ebé bapak ho sira sai ba mós atu oho ami iha mota laran, ami la ta’uk aguenta dehan mate, ami dehan lá iha buat ida, katuas mate ona, ami bele fila fali”.

Timor ukun aan ona. “Esperansa ba oin, bainhira aban bainrua sai di’ak nafatin ba oin, ba ita-nia oan sira-nia futuru ba aban bainrua nian,” espera Vítima Josefa da Silva Garsia.

Notísia relevante:Ohin, Komunidade Aileu Realiza Misa Agradesimentu Komemora Konsulta Populár

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here