Prezidente Repúblika, Francisco Guterres Lú Olo, fó pose ba embaixadór na’in tolu iha Palásiu Prezidente Nicolau Lobato, ohin. Imajen Mídia PR

DILI, 13 agostu 2019 (TATOLI)–Prezidente Repúblika (PR), Francisco Guterres Lú Olo, iha 13 agostu 2019,  iha Palásiu Prezidente Nicolau Lobato, Bairru Pité, fó pose ba Embaixadór Timor-Leste (TL) na’in-tolu ba nasaun Brazíl, Estadu Unidu Amérika no Nova Zelándia.

Liuhusi Dekretu Prezidente Repúblika númeru 36/2019, 37/2019 no 38/2019 dekreta hodi nomea Olímpio Branco nu’udar Embaixadór ba Brazíl, hodi troka Embaixadór Gregório de Sousa, Isilio Coelho nu’udar Embaixadór ba Estadu Unidu Amérika, hodi troka Embaixadór Domingos Sarmento Alves no Lisualdo Gaspar nu’udar Embaixadór ba Nova Zelándia hodi troka Embaixadór Cristiano Costa.

Embaixadór Olímpio Branco (liman karuk), Embaixadór Isilio Coelho (klaran) no Embaixadór Lisualdo Gaspar (loos). Imajen Mídia PR

Olímpio Branco, Isilio Coelho no Lisualdo Gaspar, nu’udar funsionáriu Ministériu Negósiu Estranjeiru kareira diplomata.

Olímpio Branco hasai kursu tékniku agrikultura iha Instituto Agrário de Chimoio, iha Moçambique no konklui estudu universitáriu iha área Relasaun Internasionál no Diplomasia iha Moçambique. Husi dezembru 2002 to’o setembru 2005, indijitadu nu’udar Vise-Ministru Negosiu Estranjeiru no Kooperasaun Timor-Leste. Iha tinan 2005-2010 nu’udar Embaixadór Timor-Leste ba Repúblika Popular Xina. Hosi tinan 2012-2016 nu’udar Embaixadór Timor-Leste ba Repúblika Kuba.

Isilio Coelho lisensiadu iha Relasaun Internasionál no Siénsia Polítika iha Universidade Nova de Lisboa, Portugal, no foti grau Mestre iha Seguransa Internasionál no Governasaun Globál iha Universidade de Londres, Reinu Unidu. Hosi 2003-2007 nu’udar Konselleiru ba Embaixada Timor-Leste iha Lisboa. Iha 2011 nu’udar Embaixadór Timor-Leste ba Japaun. Antes nomeadu nu’udar Embaixadór ba Estadu Unidu Amérika asume kargu nu’udar Diretór Jerál ba Asuntu Bilaterál iha Ministériu Negósiu Estranjeiru no Kooperasaun.

Lisualdo Gaspar lisensiadu iha Agropekuáriu iha Universidade Nacional Timor-Lorosa’e. Hasai kursu Mestradu iha Administrasaun Públika iha Australian National University (ANU). Hosi 2005-2008 indikadu nu’udar Segundu-Sekretáriu iha Embaixada Timor-Leste iha Camberra. Entre 2011 no 2015 hala’o funsaun nu’udar xefe Delegasaun Timor-Leste iha negosiasaun ho Indonézia kona-ba fronteiras terrestre. Molok ne’e, hala’o kna’ar nu’udar Diretór ba Sudeste Aziátiku no Oceánia.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here