DILI, 12 agostu 2019 (TATOLI)—Koordenadór Sesaun Programa Ba Komemorasaun Loron Konsulta Populár ba dala-20, ohin, informa katak Komisaun Organizadora (KO) lansa kompetisaun lee poema rezisténsia nian ne’ebé iha faze eliminasaun ne’e kompetitór ema na’in 38 mak partisipa.

Kompetisaun lee poema rezisténsia ne’ebé organiza husi Centro Nacional Chega! (CNC) ho poeta timoroan sira ne’e, sai nu’udar dalan ida oinsá ita introdus ba jerasaun foun sira no mós ba publiku kona-ba kontribuisaun ita-nia poeta sira iha luta ba libertasaun nasionál.

Poema sira ne’ebé kompetitór sira lee ne’e iha poema obrigatóriu “Povu Maubere Sei La Sai Atan Ba Ema Ida” no poema eskollidu ualu (8) seluk ne’ebé foti husi poema sira ne’ebé halibur husi poema ne’ebé mak publika tiha ona husi tinan 1976-1999.

“Ha’u hakarak hatete, liuhusi kompetisaun ne’e, ita hakarak halo ba públiku hatene katak luta naruk tinan 24 nia laran ne’e, ema hotu-hotu kontribui. Klaru, ita iha Frente Klandestina, Frente armada, frFren Diplomásia, maibé mós iha ita-nia moris ne’e ita iha poeta (dadolin-na’in) sira ne’ebé mak espresa sira-nia sentimentu pérténsia ba luta ida ne’e liuhusi dadolin sira,” dehan Koordenadór Sesaun Programa Ba Komemorasaun Loron Konsulta Populár ba Dala-20, Hugo Maria Fernandes, ba Ajénsia TATOLI lihusi entrevista iha lansamentu Kompetisaun Lee Poema Rezisténsia iha Salaun Centro Covenção Dili (CCD), Merkadu Lama, Dili, Segunda (12/8/2019).

Poezia sira ne’e mós, nia hatutan, sai nu’udar buat ida ne’ebé mak halo ema-nia espiritu ne’e moris nafatin. Liuhusi liafuan murak sira kona-ba solidariedade ba luta ida ne’e, halo ema-nia espiritu ba luta ne’e kontinua mosu no kontinua lakan.

“Entaun, ida ne’e mak iha komemorasaun loron Konsulta Populár ba dala -20 ne’e, ita hakarak introdus poema rezisténsia sira ne’e ba jerasaun foun sira, katak iha partisipasaun no iha kontribuisaun kompenente hotu-hotu nian iha luta ida ne’e. La’ós de’it Frente Klandestina, Frente Armada no Frente Diplomásia mak hamriik iha oin de’it, maibé ita-nia poeta sira mós kontribui ho dalan ne’ebé mak sira liu,” nia haktuir.

Tanba, tuir nia, liafuan sira husi poema bainhira ita halo reflesaun bele lori ita halo mudansa ba ita-nia pensamentu, sobu ema-nia sentimentu ne’ebé mak husi nakukun ba naroman liuliu fó esperansa. Frente tolu ne’e luta ho fizikamente no luta ho kilat maibé espiritu luta ne’e rega no fui ho liafuan kmanek no lifuan murak sira husi poema sira ne’e.

Tanbasá mak tenke foti poema “Povu Maubere Sei La Sai Atan Ba Ema Ida” sai poezia obrigatóriu, nia hatan, atu refleta katak luta ida ne’e luta naruk ida, tinan 450 no situasaun ida iha okupasaun ilegál husi Indonézia ne’ebé halo ita sai atan no obriga ita tenke luta makaas [nafatin] hodi harii ita-nia identidade ukun rasik-aan.

“Tanba ita hakarak harii ita-nia identidade. Antes buat sira ne’e akontese, timoroan sira moris nu’udar ema ida, nasaun ida ho ninia identidade. Maibé tanba iha situasaun ne’ebé ita sai tiha atan. Entaun ida ne’e, akontese la’ós dede’ iha tinan 450 liubá maibé iha tinan 24 nia laran mós ita kontinua sai atan. Entaun, poezia obrigátoriu ne’e fó hanoin ba jerasaun foun sira memória pasada ne’ebé ita liu tiha ona,” Hugo esplika.

Kompetisaun refere hala’o, nia haktuir, atu publiku fó rekuñesimentu ba poeta sira tanba luta ba autodeterminasaun ne’e komponente hotu-hotu luta. Segundu, ita iha kultura no iha dadolin ne’ebé ita tenke dezenvolve no promove para ita-nia jerasaun foun sira labele sente lakon, liuliu iha situasaun mundu globalizadu bainhira ema hanoin katak buat sira ne’e laiha ona.

“Ha’u bele dehan katak, dadolin sira ne’e buat ne’ebé mak husi beiala sira tun mai tenke kontinua. Poezia sira ne’e iha forma mak moderna oituan. Maibé abut ne’e metin iha ita-nia kultura,” Hugo fó hanoin

Jornalista: Cancio Ximenes

Editór.       : Rafy Belo

HAKEREK NO HATÁN

Please enter your comment!
Please enter your name here