Xefe Aldeia Likisi, Suku Poetete, Postu Administrativu Ermera Vila, Aleixo Martins

ERMERA, 12 agostu 2019 (TATOLI)—Komunidade iha suku Poetete, Postu Administrativu Ermera Vila, Munisípiu Ermera, husu ba Governu Sentrál atu fó prioridade ba estrada rurál tanba kondisaun estrada ladún di’ak hahú hosi Biluli to’o mai to’o Ermera tuan no mós  hosi Aifu to’o Likisi.

“Ami-nia hakarak liu mak bee ho estrada. Ami husu ba Governu atu tau prioridade ba estrada rurál sira, nune’e prosesu dezenvolvimentu bele balansu,” dehan Xefe Aldeia Likisi, Suku Poetete, Postu Administrativu Ermera Vila, Aleixo Martins, ko’alia asuntu ne’e iha Aifu (Poetete), segunda ne’e.

Nia haktuir, kondisaun estrada aat dezde iha tempu Indonézia to’o oras ne’e. Ho kondisaun estrada ne’ebé grave ne’e, difikulta komunidade lori produtu lokál ba iha merkadu. Estrada hosi Gleno to’o Suku Poetete iha kilómetru lima, tanba ne’e husu governu tau iha ajenda.

Iha fatin hanesan, komunidade José Trindade, husu governu hadi’a lalais estrada ne’e nune’e bele fasilita komunidade lori pordutu lokál ba merkadu.

“Loloos ne’e, Governu tenke tau atensaun ba ami-nia estrada iha rurál. Ita ukun-aan kle’ur ona mós ita la’o ba estrada ne’e halo ita triste liu,” hateten komunidade hosi Suku Legimea ne’e.

Hatán ba preokupasaun ne’e, Prezidente Autoridade Munisipál Ermera, José Soares, dehan asuntu estrada tama ona iha prosesu.

“Estrada hosi Gleno mai to’o Ermera tuan ne’e ita iha kompañia ida mak kaer hela. Oras ne’e iha prosesu ateru nia laran. Ba oin mak ita haree took sei fui alkatraun ka lae, maibé estrada Ermera Vila ba Fatubessi iha ona periodu serbisu, tanba kompañia Xina, Shan Hai, mak agora kaer hela obra ne’e,” nia esplika.

José hatutan, iha outubru 2020, kompañia tenke entrega ona ba Governu. “Ita rekoñese komunidade nia halerik kona-ba situasaun estrada maibé ita ajuda liuhosi Uniaun Europeia ne’e agora halo hela, nune’e mós estrada hosi Liquiçá mai sai fali iha Tokoluli-Railaco nian,” nia tenik.

Jornalista: Evaristo Soares Martins

Editór: Xistoo Freitas

 

HAKEREK NO HATÁN

Please enter your comment!
Please enter your name here