Prezidente KO, Manuel Abesi. Foto TATOLI: Nelia Fernandes

AILEU, 12 agostu 2019 (TATOLI)-Munisípiu Aileu Festeja loron importante sira ho atividade desportiva hanesan jogu futebol no atividade sira ne´e mós hala´o regularmente. Jogu ne’e realiza iha Kampu Sabraka Laran no hetan antusiazmu maka’as hosi juventude, labarik nós inan-aman sira.

Kompetisaun jogu entre ekipa futebol sira iha Aileu. Foto TATOLI: Nelia Fernandes

Prezidente Komisaun Organizadora (KO) hanesan mós Prezidente Konsellu Juventude Munisípiu Aileu, Manuel Isac Abesi, hateten katak objetivu hosi eventu ida ne’e mak organiza juventude hotuhotu para bele hatudu sira-nia sentimentu orgullu, apresiasaun, sentimentu festeza ba loron importante sira ne’ebé mak ita-nia nasaun selebra.

“Ba époka ida ne’e ita selebra iha ámbitu selebrasaun 30 agostu nian. Infelizmente atividade kopa 20 maiu ne’e atividade regular ida ita halo kada tinan hodi selebra loron selebrasaun da independénsia 20 maiu, maibé ba dadaun ne’e ita adia oituan, muda mai iha fulan agostu hodi selebra fila fali loron 30 agostu nian,” informa hateten Prezidente KO, Manuel Isac Abesi ba jornalista sira hafoin ramata akompaña jogu ne’e, domingu lorokraik (11/08/2019).

Nia informa liután katak atividade desportu ne’e organiza hosi Asosiasaun Futebol Munisípiu, autoridade munisípiu, hamutuk ho Konsellu Juventude Munisípiu mak organiza no jogu ne’e konsege anima Aileu oan sira no prodús ona atleta balun. “Liuliu ita haree iha antuziazmu entre adeptu jogadór sira, hodi partisipa iha selebrasaun loron importante ida ne’e”.

Prezidente KO, Manuel Isac Abesi haktuir, ekipa ne´ebé partisipa iha jogu ne´e hamutuk 17; ekipa 15 husi Munisípiu Aileu rasik enkuantu rua husi munisípiu viziñu, Ermera ho naran Arábica, ida husi Dili naran Fagen.

Jogu ne´e hahú abertura iha loron 3 agostu semana kotuk no sei finál iha 30 agostu hodi selebra loron Konsulta Populár. “Kada klubu ka ekipa sira rejistu ho 20 jogadór, no treinadór rua hamutuk ho klubu sira hotu 17 hamutuk kuaze 300 jogadór partisipa iha ne’e, seidauk konta ho adeptu, seida’uk konta ho ekipa husi klubu sira-nia estrutura mós,” nia informa.

Prezidente KO,Manuel Isac Abesi  reforsa tan katak atividade desportiva ne´e hanesan atividade regular no hetan parseria husi SEJD (Sekretáriu Estadu Juventude no Desportu), ne´ebé hala´o tinan-tinan.

“Orsamentu ba atividade ne’e hanesan baibain, hanesan ona ohin ha´u hateten ona katak, atividade ida ne’e hanesan atividade regular, hetan parseira hosi CJD tinan-tinan, apoiu ba époka da ha’at ida ne’e, sira apoiu dois mil dólares hodi realiza jogu ida ne’e no mós klubu sira kontribui 100 dólares; hamutuk três mil sete centos dolares maka uza hodi realiza eventu kopa ida ne’e nian,” nia relata.

Kona-ba prémiu, tuir prezidente KO katak sei fó sai hafoin rezultadu finál tanba daudaun ne´e jogu sei la´o hela tanba ne´e mak labele fó sai antes. “Depois finál ita fó ona premiu ba ekipa manan na´in sira, hafoin ita bele fó sai hira-hira,” nia hateten.

Nia haktuir, jogu ne’e komesa kuaze semana rua ona, hahú hosi 3 agostu mai to’o agora; loroloron, hodi hola parte iha selebrasaun ida ne’e.

“Hamutuk mós iha ne’e, iha eventu ida, eventu telcomcel nian, entaun mak ami fahe hela oráriu para sira joga troka malu, joga hela para anima komunidade, juventude no labarik sira iha munisípiu hodi bele hola parte iha selebrasaun ida ne’e,” nia informa.

Prezidente KO, Manuel Abesi konfirma katak data prevista hodi ensera jogu ne´e mak 30 agostu no iha enseramentu ne´e sei konvida mós autoridade nasionál sira hodi partisipa no ensera.

“Ita haree tempu oituan dia 30 agostu iha selebrasaun nasionál, ema hotu sei partisipa, iha ne’ebá karik ita hadi’a oituan hodi hein prezensa sira hosi sira nian, ne’ebé data tentativa ba finál ne’e mak dia 30 de agostu, ita haree oinsa para bele muda,” informa  Prezidente KO ne´e.

Entertantu, iha Munisípiu Aileu alende komemora loron Konsulta Populár 30 agostu ho jogu, iha parte seluk komemora mós ho kompetisaun diskursu publiku, kompetisaun marsa orden unida, kompetisaun múzika tradisionál no atividade populár sira seluk tan.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here