Prezidente Komisaun Organizadora Tinan 20 Aniversáriu Konsulta Populár, Xanana Gusmão. Foto TATOLI: António Gonçalves

DILI, 11 agostu 2019 (TATOLI)—Hori otas no hori ua’in, Xanana ninia lia-tatoli sempre fó kbiit ba ema ua’in atu hadeer. Hori luta no hori funu, Xanana ninia lian “TATOLI” (=Tama To’o LIdun) sira be namkrai iha mundu no territóriu laran tomak. Hori funu no hori ukun rasik aan, Xanana ninia lian tatoli nanesan múzika “Tebe-Tebe” ida ne’ebé sempre lori ema hananu no dahur hamutuk hodi esprese sira-nia vitória.  

Xanana nia lian TATOLI=“Tama To’o Lidun” sira be lulik hodi halulik lia-tatoli ne’e sai giaun ida ne’ebé timoroan sira moris banati. Xanana nia lian “Tama To’o Lidun” sira ne’ebé subar iha ema-nia fuan sira be hatene hadomi atu hadomi rai-lulik Timor-Leste sai nasaun ne’ebé lulik no independente ho identidade rasik.

Iha ambítu ukun rasik-aan, iha komemorasaun Loron Konsulta Populár ba dala-20 (30 agostu 1999-30 agostu 2019), nu’udar Prezidente Komisaun Organizadora Tinan 20 Aniversáriu Konsulta Populár, Kay Rala Xanana Gusmão, hato’o hikas ninia lia-tatoli (mensajen) ba povu doben Timor-Leste ne’ebé namkari iha rai-lulik Timor-Leste nia laran.

Mensajen ne’e, Xanana hato’o liuhusi lansamentu ba Komemorasaun Konsulta Populár ba dala-20 ne’ebé lansa husi Primeiru Minsitru Timor-Leste, Taur Matan Ruak, iha Segunda (10 Juñu 2019) iha Centro Nacional Chega! (CNC), Antigu Komarka, Balide, Dili, Timor-Leste. Iha lansamentu refere, Oitavu Governu Konstutitusionál, Primeiru Ministru, Taur Matan Ruak, halo lansamentu ba Ezibisaun Eventu Istóriku Sira Tinan 1999 nian.

Iha lansamentu refere, komisaun organizadora sira dada-hikas timoroan sira-nia hanoin ba loron horseik nian hodi halo reflesaun ba múzika ne’ebé artista-múzika timoroan sira hananu iha Konsulta Populár 1999, ne’ebé sunu povu Timor-Leste nia espiritu hakat ba sentru votasaun [urna] atu vota ba ukun rasik-aan ka vota ba autonomia.

Grupu múzika ne’ebé iha biban ne’ebá hakerek no hananu múzika refere, Lahane Group, mosu hikas iha palku leten hodi hananu múzika “Oras To’o Ona” ho ksolok tebes. Ema hotu simu ho basa-liman naruk. Ksolok nafunan iha timoroan ida-idak nia oin, hodi refleta sira-nia tempu pasadu be kruel. Múzika seluk, múzika “Loron Aban Hahú Ohin” no “Mate Mohu” mós semo aas, halo timoroan sira haksolok hodi hananu, hanoin no hanoin.

Biban ida ne’ebé, iha biban ne’e, fó biban ba timoroan sira atu halo reflesaun ida be kle´an. Iha komemorasaun loron Konsulta Populár ba dala-20 ne’e, sira rona hikas múzika rezisténsia sira ne’e, no hodi hakat tuir eventu istóriku sira ne’ebé fotográfu-sira grava metin iha fotografia istóriku sira iha ezibisaun ne’ebé loke ba publiku sira atu haree.

Iha biban ne’ebá, biban atu rona Prezidente Komisaun Organizadora Tinan 20 Aniversáriu Konsulta Populár (30 agostu 1999-30 agostu 2019), Kay Rala Xanana Gusmão, nia lia-tatoli (mensajen) maibé Xanana la marka pezensa. Iha biban ne’ebá, timoroan sira só bele asesu  Xanana ninia lia-tatoli (mensajen) liuhusi “Livriñu Eventu Istóriku 1999” ne’ebé komisaun organizadora sira prodús no fahe ba publiku.

Mensajen S.E. Kay Rala Xanana Gusmão

Prezidente Komisaun Organizadora Tinan 20 Aniversáriu Konsulta Populár

Povu Timor Lorosa’e…

Tinan ida ne’e, tinan espesiál tebes tanba ita sei komemora vigésimo Aniversáriu ba aktu ne’ebé importante tebes. Aktu ne’ebé fundamentál ba ita atu manan fila fali ita-nia independénsia ho Konsulta Populár.

Ne’e duni, hakarak fó hatene de’it katak iha komemorasaun, sei iha atividade oi-oin, liliu orientada ba iha jerasaun foun sira atu bele partisipa, bele mós eduka sira nia-aan. Ohin loron, imi (jerasaun foun sira) boot hotu ona no estuda sai matenek maibé keta haluha katak husi pasadu mak ita-mai to’o ohin loron.

Ne’e duni, husu ba universitáriu no foinsa’e sira atu partisipa ho di’ak ho laran, hodi nune’e fó hanoin fila fali ba ita, dalan terus no susar ne’ebé lori ohin ita sai ukun rasik-aan, fó liberdade ba ita hotu, lori demokrasia ba ita hotu hodi ita bele hateke ona ba loron ikus nian.

Dili, 7 Juñu 2019

Prezidente Komisaun Organizadora

S.E. Kay Rala Xanana Gusmão

Lia-tatoli (mensajen) ida ne’e, hanesan odamatan-boot ida ba timoroan sira hotu ne’ebé namkari iha munisípiu sira naklekar iha Timor-Leste atu atu tama ba komemorasaun loron Konsulta Populár ne’ebé sei selebra iha 30 Agostu 2019 be mai. Xanana Nia Lian “TATOLI” [edisaun] tuir mai sei “Tama To’o Lidun” sira munsípiu [sanulu resin tolu] ninian.

Jornalista: Cancio Ximenes

Editór     : Rafy Belo

HAKEREK NO HATÁN

Please enter your comment!
Please enter your name here