MALIANA, 11 agostu 2019 (TATOLI) – Ekipa AD SLB susesu halakon Atlético Ultramar ho rezultadu 3-1, iha jogu kontinuasaun Liga Futeból Amadora (LFA) époka 2019 ne’ebé hala’o iha Estádiu Munisipál Malibaca Maliana, domingu ne’e.

Derrota ne’ebé Ultramar hetan lori ekipa refere kontinua tuur iha jona dezpromosaun hamutuk ho Académica FC. Enkuantu, SLB hakmatek iha zona seguru.

Golu vitória SLB prodúz hosi jogadór Paulo Gally (22) iha minutu 61, Rivaldo Correia (7) 69, Bakayoka Ozi (13) 83 no golu úniku Ultramar hatama hosi Jorge Godinho iha minutu 12.

Jogu refere dirije hosi árbitru Elísio Lopez, juiz liña Filomeno da Silva, Pedro Carvalho no árbitru rezerva, Artur Belo.

Hafoin jogu ramata Tatoli tenta atu halo entrevista ho treinadór ekipa rua relasiona ho jogu refere maibé lakohi fó komentáriu.

Entretantu, informa mós katak, jogu seluk ne’ebé hala’o iha Estádiu Munisipál Dili entre Lalenok kontra Boavista FC Timor, la konsege ramata tanba mosu dezintendimentu iha kampu laran. Tanba ne’e, árbitru no komisariu jogu foti desizaun hapara provizóriu jogu ne’e no hala’o fali iha loron tuir mai.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here