Xefe Suku foun Leorema, Sandra de Araújo

LIQUIÇÁ, 11 agostu 2019 (2019)—Prezidente Autoridade Munisipál Liquiçá, Domingos da Conçeição dos Santos ‘Makaro’ fó-sai, katak Leorema iha ona Xefe Suku Foun.

Administrasaun Munisipál, CNE ho STAE, sai hanesan observadór ba prosesu eleisaun ba Xefe Suku Leorema, iha 1 agostu 2019.

Tuir Prezidente Autoridade Munisipál Liquiçá ne’e, prosesu eleisaun baziea Dekretu Lei númeru 3/2016 kona-ba lideransa. Dekretu Lei númeru 3/206 maka orienta Administrasaun Munisipál Liquiçá hodi halo eleisaun.

“Prosesu eleisaun ne’e tuir Dekretu Lei 3/2016 kona-ba lideransa komunitária nian, tanba xefe suku nia aujénsia iha loron 15 tenke fó ba PAS (Pesoál Administrasaun Suku) maka jere dadaun administrasaun suku, maibé  liuhosi loron 15 ne’e tenke fó ba xefe aldeia ida ne’ebé idade boot liu para prezidi prosesu administrasaun suku nian,” Makaro informa.

Prezidente Autoridade Munisipál Liquiçá ne’e fó orientasaun ba Sekretariado Tékniku Administrasaun Eleitorál (STAE) no Komisaun Nasionál Eleisaun (CNE-sigla portugés) tún ba halo investigasaun ba kazu sira ne’e hotu.

Nune’e,  ikus mai, fó oportunidade ba xefe aldeia ne’ebé ho idade boot liu prezidi reuniaun depois sira aseita ona katak tenke halo nomeasaun foun, entaun iha momentu ne’ebá hetan ona solusaun hodi nomea ema foun.

Makaro hatutan, molok tama ba eleisaun, fó oportunidade ba membru Konsellu Suku prepara kandidatura, normálmente dois terços (2/3) priénxe kórum katak se sira hamutuk ema-na’in 34, maibé prezensa ema-na’in 26 ba leten ona, entaun priénxe kórum, entaun altura ne’ebá prezensa iha ema-na’in 26.

Iha momentu ne’ebá, nia haktuir, kandidatura ema na’in-tolu—xefe aldeia na’in-rua no ida maka delegada, entaun avansa ba eleisaun.

“Ami sai observadór no lala’ok ne’e prosede lei no arranka tuir lei ka lae, prontu ami observa prosesu hotu-hotu la’o normál. Ikus mai, kandidadura na’in-tolu ne’e, mane-rua ho feto ida hanesan delegada maka liu sai xefe suku foun ba Leorema, ho naran Sandra de Araújo”,  Prezidente Autoridade Munisipál Liquiçá ne’e haktuir, iha Liquiçá, domingu ne’e.

Xefe Suku foun Leorema, Sandra de Araújo antes ne’e hanesan delegada suku, nia liu iha primeira ronda. La arranka tan ba segundu ronda.

“Primeira ronda kedas nia manán absoluta hosi delegadu hamutuk ema na’in 26. Nia hetan votu 13, ida seluk hetan votu  7, balun hetan 6,” Makaro lembra.

Prezidente Autoridade dehan, xefe suku foun maka substitui xefe suku sesante ne’ebé oras ne’e deskonfia involvidu iha krimi organizadu ne’ebé hamate ema na’in-rua iha Baura, Suku Leorema, Postu Administrativu Bazartete, Munisípiu Liquiçá.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here