Veterana ‘Kasihan’ bainhira dadalia ho jornalista sira iha Munisípiu Liquiçá, sesta (9/8). Imajen Tatoli/Evaristo Soares Martins

MAUBARA, 9 agostu 2019 (TATOLI) – Veterana Madalena Soares ‘Kasihan’, observa kona-ba kazu soe bebé ne’ebé durante ne’e akontese tanba feto timoroan balun goza demais liberdade.

“Ita bele hatete katak la-respeita disiplina, aplika disiplina ne’e uituan de’it, maibé goza demais liu liberdade. Bainhira liberdade akompaña ho disiplina, entaun feto nia moris iha sosiedade ho dignidade”, dehan veterana ne’e bainhira partisipa iha atividade haloot restu mortál  saudozu José Cirilo ‘Maubrani’, iha Maubara, sesta ne’e.

Nune’e, nia husu ba organizasaun feto sira tenke luta maka’as kontra situasaun hanesan kazu soe bebé

Veterana ne’e afirma, defende direitu feto nian labele fiar demais ba kultura estranjeiru, tanba sira mai apoia Timor-Leste liuhosi kooperasaun oioin.

“Ita mak luta to’o ukun-aan, ita lakohi fiar ita-nia kultura, ita hahí fali ema seluk nian. Loloos ne’e defende ita-nia kultura tanba disiplina ba kultura nanis ona”, nia dehan.

Kasihan haktuir, iha funu laran Organizasaun Pupulár Feto Timor (OPMT-sigla portugues) defende rai, povu, kultura no feto ho mane nia dignidade.

“Iha baze-apoiu respeita malu tebes. Agora dadaun ita la-respeita disiplina mak ita haree ona. Feto nia moris la’o iha dalan la loos. Soe no sunu bebé iha fatin-fatin”, veterana ne’e fó hanoin ba feto timoroan, relasiona kazu soe bebé ne’ebé kontinua akontese.

Tuir Veterana ne’e, atu liberta situasaun ne’e, presiza timoroan hotu nia kontribuisaun.

“Feto foinsa’e hamutuk ho ami ferik sira, ita bele luta kontra oinsá mak bele sai hanesan ne’e. Ita hateten loloos ba governu, ita la luta hosi rurál mak sa’e ba, entaun susar tebes”, nia dehan tan.

Nia salienta, tenke hahú uluk hosi área rurál, nune’e bele deskobre impaktu mai hosi ne’ebé, mai hosi fatór ekonómiku, sosiál ka fatór seluk. Tanba, tuir nia, maluk feto sira ne’ebé soe bebé ne’e hosi Munisípiu Dili, tanba ne’e tenke hatene loloos fukun ne’e.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here